"Bəzi üçüncü ölkələr vəziyyəti gərginləşdirməyə çalışır, bunlardan biri Fransadır" Politoloq

Oktyabrın 11-də Azərbaycan Respublikasının Prezidenti İlham Əliyev MDB-yə üzv dövlətlərin təhlükəsizlik və xüsusi xidmət orqanları rəhbərləri Şurasının 53-cü iclasının iştirakçılarını qəbul edib. Görüşdə Rusiya Federasiyası, Belarus, Qazaxıstan, Qırğızıstan, Özbəkistan, Tacikistan xüsusi xidmət orqanlarının və MDB-yə üzv dövlətlərin Antiterror Mərkəzinin rəhbərləri iştirak etmişlər.
Ölkə başçısı tədbirdəki çıxışında bir çox mühüm əhəmiyyət kəsb edən məsələlərə toxundu, bir sıra məsələlərə aydınlıq gətirdi. Prezident həmçinin dünyada və regionda öz mənafeləri naminə qeyri-konstruktiv və təxribatçı mövqedən çıxış edər ölkələr, xüsusilə Fransanın mövqeyindən danışıb.
Qeyd edilib ki, Ermənistan tərəfindən Azərbaycan ərazilərinin 30 ilə yaxın müddətdə işğal altında saxlanılması regional təhlükəsizliyi təhdid edən əsas problem idi. Bu gün bu maneə aradan qaldırılıb və indi davamlı sülhün təmin olunması üçün unikal fürsət yaranıb.
Azərbaycanın Cənubi Qafqazda sülh və əməkdaşlıq mühitinin yaradılması üçün hər zaman ardıcıl mövqe nümayiş etdirib. 44 günlük Vətən müharibəsindən sonra imzalanan üçtərəfli Bəyanatın bəzi müddəalarının Ermənistan tərəfindən yerinə yetirilməməsi bu ölkənin ənənəvi təcavüzkar siyasətini davam etdirmək niyyətinin göstəricisi idi.
Azərbaycan Ermənistandan fərqli olaraq regional problemlərin bilavasitə region ölkələrinin iştirakı ilə həll edilməsinin tərəfdarı olub. Rəsmi Bakının irəli sürdüyü "3+3" əməkdaşlıq formatı Cənubi Qafqazda açıq qalan və mübahisə doğuran məsələlərin konstruktiv ruhda müzakirəsi üçün ən effektiv platforma ola bilər. Lakin təəssüf ki, biz Ermənistan hakimiyyətinin tamamilə fərqli və qeyri-adekvat addımlarının şahidi oluruq. Bəzi üçüncü ölkələr isə bu prosesdə qeyri-konstruktiv mövqedən çıxış edərək, vəziyyəti gərginləşdirməyə çalışır. Belə ölkələrdən biri də Fransadır. Yeri gəlmişkən qeyd etmək lazımdır ki, Fransanın Avropa və xarici işlər naziri Katrin Kolonanın Senatda çıxışı zamanı Azərbaycana qarşı səsləndirdiyi əsassız iddialar da bu qərəzli siyasətin davam etdirildiyini göstərir.
Bildirilib ki, Fransız rejimi milyon yarım əlcəzairlini təkcə əlcəzairli və müsəlman olduğuna görə məhv edib. Bu, soyqırımıdır. Fransa Afrikanın digər hissələrində və bütün dünyada qanlı cinayətlər törədib. Fransanın bu gün müstəmləkələr saxlaması da ağlasığmazdır. Ona görə də bu gür keçmişə malik olan Fransanın bu gün dünyanın digər bölgələrindəki münaqişələrin aradan qaldırılmasında vasitəçilik etməsi mümkün deyildir.
Azərbaycan Ermənistanla münasibətlərin normallaşmasının tərəfdarıdır. Çünki bölgədə sülh, əməkdaşlıq və rifahın təmin olunması üçün sülh sazişinin imzalanması vacib əhəmiyyət kəsb edir. Azərbaycan bu məsələdə istənilən ölkənin, beynəlxalq təşkilatın vasitəçilik təşəbbüsünü alqışlayır. Lakin bu cür təşəbbüslər səmimi və tərəfsiz olmalıdır. Biz isə onu müşahidə edirik ki, bəzi ölkələr Azərbaycana qarşı əsassız ittihamlarla, böhtanlarla çıxış edir. Qərəzli bəyanatlar səsləndirir. Eyni zamanda, Azərbaycanla Ermənistan arasında münasibətlərin normallaşması üçün vasitəçilik etməyə hazır olduğunu bəyan edir. Bu, yumşaq ifadə etsək, tamamilə anlaşılmaz bir mövqedir. Digər tərəfdən, vasitəçilik missiyasının ən vacib prinsipi tərəfsizlikdir. Ona görə də birmənalı olaraq Ermənistanı dəstəkləyən, beynəlxalq hüququn fundamental prinsiplərini nəzərə almayan dövlətlərin vasitəçilik missiyası heç bir nəticə verə bilməz.
Ermənistanın öz üzərinə götürdüyü öhdəlikləri yerinə yetirməsi Cənubi Qafqazda davamlı sülhün yaradılmasının başlıca formuludur. Regiondan uzaq bəzi dövlətlərin bölgədəki proseslərə müdaxilə etmək cəhdləri münasibətlərin normallaşmasına müsbət töhfə vermir.

Metin Hüseynov - siyasi sərhçi, politoloq

Telegramda izləyin