"Fransanın Azərbaycanla pisləşən siyasəti regionda nüfuzuna ciddi zərbə vurur" - DEPUTAT

"Fransanın son dövrdə anti-azərbaycan təbliğatı və fəaliyyəti geniş vüsət alıb. Bunun iki səbəbi var: 1. Fransanın müəyyən dairələrinin Türkiyə -Azərbaycan ilə bağlı tarixdən gələn varlığımızı qəbul edə bilməməsi. 2) Fransanın daxili problemlərinin kəskinləşməsidir".

Bu sözləri Sonxeber.az-a açıqlamasında Milli Məclisin deputatı Aydın Mirzəzadə deyib. Onun sözlərinə görə Fransanın indiki hakimiyyətinin apardığı siyasət əhali arasında böyük narazılıq yaradır:

"Vaxtaşırı keçirilən kütləvi mitinqlərdə prezident Emmanuel Makronun daxili siyasəti kəskin tənqid olunur. O diqqəti daxili problemlərdən uzaqlaşdırmaq üçün Fransanı beynəlxalq aləmdə güc olduğunu və hansısa Fransanın maraqlarına, digər məsələlərə dair mübarizə apardığını göstərməyə çalışır. Ancaq görünən ondan ibarətdir ki, Makronun daxili siyasəti kimi xarici siyasətidə çox qüsurludur. Bu Fransanın imicinə ciddi ziyan vuran siyasətdir".

Deputat bildirib ki, Fransanın son dövrlər Afrikadan qovulması və ona qarşı kəskin etirazların güclənməsi onun xarici siyasətinin iflasa uğradığını göstərir: "Mümkündür ki, Fransanın müəyyən şirkətləri Azərbaycan bazarında onlara sərf edən nəticələr əldə etmədiyinə görə Azərbaycana siyasi təzyiq edir. Azərbaycanın öz maraqlarından, öz milli mənafeyindən çəkilməyə və Fransa şirkətlərinə Azərbaycan bazarında maksimum gəlir göstərəcək şərait yaratmağa vadar etmək istəyir".

Aydın Mirzəzadə qeyd edib ki burada erməni faktoru da rol oynayır. "Ancaq görünən ondan ibarətdir ki prezident Makronun apardığı daxili-xarici siyasət bu gün Fransa üçün çox ciddi problemlər yaradır. Özü üçün aydındır ki, türk dünyasına qarşı apardığı siyasət hər hansı bir nəticə verməyəcək. Çünki türk dövlətləri, ilk növbədə Azərbaycan öz maraqlarını qoruya bilir. Beynəlxalq mühitdə nüfuz qazanıblar. Bütün məsələlərdə xalqın maraqlarını və suveren hüquqlarını qorunmasını əsas götürürlər. Fransanın Azərbaycanla günü-gündən pisləşən siyasəti ilk növbədə onun bu regionda nüfuzuna çox ciddi zərbə vurur".

Telegramda izləyin