"Sülh müqaviləsi demək olar ki, hazır vəziyyətdədir" - Politoloq

Ermənistanın Baş naziri Nikol Paşinyan Tbilisi Beynəlxalq İpək Yolu Forumunun açılış mərasimində bir neçə aya İrəvanla Bakı arasında sülh sazişi imzalana biləcəyini deyib.

Politoloq Qabil Hüseynli Sonxeber.az-a bildirib ki, Ermənistan Azərbaycana Qarabağdan könüllü getmiş ermənilərin geri qayıtması üçün öhdəlik qoymasa, sülh müqaviləsi imzalamaq mümkündür:

"Zənnimcə, söylənilənlər həqiqətə yaxındır. Sülh müqaviləsi demək olar ki, hazır vəziyyətdədir. Ən prinsial məqamlar razılaşdırılıb. Sadəcə olaraq yüksək səviyyəli görüşdə bəzi məqamlar, məsələn, delimitasiya və demarkasiya məsələlərində fikir ayrılıqları var. Azərbaycan Prezidenti və Ermənistan Baş nazirinin görüşü zamanı bu prinsipial məsələlər də razılaşdırıla bilər və bütünlükdə sülh müqaviləsi imzalana bilər. Amma burada bir məqam var. Qarabağdan baş götürüb gedən ermənilərin geriyə qaytarılması haqqında bizə hansısa öhdəlik qoymamalıdılar. Qayıdan qayıdar, qayıtmayan qayıtmaz. Hər hansı beynəlxalq mexanizmə ehtiyac yoxdur.Ona görə sülh müqaviləsini ərazini öz xoşu ilə tərk etmiş erməni vətəndaşlarının geri qayıtması ilə əlaqələndirmək olmaz. Sülh variantına hər hansı "qaçqın"ın geri qayıtması məsələsini aid etməyə ehtiyac yoxdur. Əgər aid etməyəcəklərsə, bu məsələni obyektiv aparacaqlarsa, bu ilin sonuna qədər sülh müqaviləsi imzalana bilər. Ortaya yenə kələ-kötür məsələlər atacaqlarsa, ləngimə ola bilər. Güman edirəm ki, bu olmayacaq".

Telegramda izləyin