"Azərbaycan xalqının maraqların hədəfə almış heç bir cinayətkar ədalət mühakiməsindən kənarda qala bilməz"-ŞƏRH

"Antiterror tədbirlərinin ardınca Qarabağ iqtisadi rayonumuzda mövcud olmuş separatçı rejimin ələ keçirilən vəzifəli şəxslərinin hər birinə qarşı konkret cinayət əməlləri üzrə ittihamlar irəli sürülüb".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, onların hər birinə qarşı şəxsiyyət, sülh və insanlıq əleyhinə, o cümlədən müharibə cinayətlərinə istinad etmək üçün çoxsaylı səhih, təkzibedilməz faktlar var.

"Onların demək olar ki, hamısı törətdiyi əməlləri özləri ifadələrində təsdiq edib və Azərbaycan xalqına və Azərbaycan dövlətinin mənafelərinə münasibətdə törədilmiş cinayətlərin əsas təşkilatçısı, təhrikçisi və icraçısı qismində çıxış etdiklərini etiraf ediblər.
Bu mənada, həmin şəxslərin bu gün Qərbdən müdafiə olunması ikili standartların və riyakarlığın ən bariz göstəricisidir.
Bir qayda olaraq demokratiya, insan haqları, qanunçuluq və qanun qarşısında bərabərlik prinsipindən dəm vuran, özünü ədalət mücəssəməsi elan edən çoxsaylı Qərb subyektləri, o cümlədən Fransa bu gün faktiki olaraq əməlləri təkzibolunmaz dəlillərlə sübut olunmaqda olan canilərin vəkili kimi çıxış edir.
Lakin, təbii ki, Azərbaycan müstəqil iradə sahibidir. Azərbaycan dövlətinin, Azərbaycan xalqının maraqlarını, mənafelərini hədəfə almış heç bir cinayətkar ədalət mühakiməsindən kənarda qala bilməz və hər kəs törətdiyi əməlin cəzasını mütləq qaydada almalıdır.
Bu prosesə nə Fransa, nə hər hansı üçüncü bir subyekt qarışa, müdaxilə edə bilməz".

Telegramda izləyin