"Ermənistan bir-iki silah alır, Azərbaycan şikayət etməyə başlayır" - Simonyan

Ermənistan Parlamentinin spikeri Alen Simonyan Azərbaycanın Ermənistanın silah alması ilə bağlı narazılığına münasibət bildirib.

Sonxeber.az xəbər verir ki, bu barədə erməni mətbuatı məlumat yayıb.

Simonyan bildirib ki, Azərbaycan Ermənistanın müdafiə vasitələri əldə etməsindən şikayətlənir, özü isə silah almağa davam edir.

"Ermənistan bir-iki silah alır və Azərbaycan şikayət etməyə başlayır. Azərbaycanda nüvə silahından başqa hər şey var və bütün dünyaya təhrif etməyə çalışır ki, Ermənistan silahlanır, çünki onun hansısa hücum planları var. Mən rəsmən bəyan edirəm ki, Ermənistanın heç bir ölkəyə hücum etmək planı yoxdur. Beynəlxalq ictimaiyyət bu gün diqqətini Azərbaycanın milyardlarla dollar dəyərində silah aldığına yönəltməlidir. Belə bir sual yaranır ki, Azərbaycana bu qədər silah nəyə lazımdır", - deyə Simonyan bildirib.

O, əlavə edib ki, Azərbaycanın sülh prosesi ilə bağlı bəyanatı hərəkətlərlə dəstəklənməlidir.

"Əgər Azərbaycan sülhdən danışırsa, bunu sübut etmək üçün əsirlərin azad edilməsindən tutmuş razılaşdırılmış prinsiplərin həyata keçirilməsinə qədər bir çox addımlar atmaq olar", - deyə Simonyan Ermənistan və Azərbaycanın üç prinsipinə toxunaraq bildirib.

Şəbnəm Lətifi

Telegramda izləyin