Beynəlxalq yarışda qızıl medal qazanan azərbaycanlı stilist: "Düşmənlərimiz yana-yana baxırdılar" - VİDEO

Azərbaycanlı stilist dünya üzrə saç düzümləri çempionatında qızıl medala layiq görülüb.

Oxu.Az xəbər verir ki, bununla bağlı görüntülər sosial şəbəkələrdə yayılıb və hər kəs tərəfindən maraqla qarşılanıb.

Oxu.Az-ın əməkdaşı qızıl medala layiq görülən beynəlxalq səviyyəli stilist Ceyhun Babayev ilə danışıb. O, yarışda ilk dəfə iştirak etdiyini qeyd edib:

"Birinci dəfədir ki, Azərbaycanın adı ilə dünya üzrə saç düzümləri çempionatında iştirak etdik. Yarışda 30 ölkə iştirak edirdi. 1 800 iştirakçı arasından biz qalib gəldik. Kollektivimizdə 22 usta var idi. Hamısını mən hazırlamışdım. Əksəriyyəti azərbaycanlı idi. Saç kəsimində 1 200 nəfər arasında "Top-5"də olduq. Saç düzümündə isə "Top-10"da idik. Bizə diplom verdilər. Bayrağımız dalğalandı".

Stilist əziyyətinin bəhrəsini gördüyünü dilə gətirib:

"14 yaşımdan bu sənətdəyəm. Hazırda 29 yaşım var. Çempionatda mənə qızıl medal verdilər. Ən gənc, sevilən müəlliməm. 10 ildir ki, öz brendimi yaratmışam. Stilistlərin 90 faizində bu brendin sertifikatı var.

Rusiyada, Yekaterinburq şəhərində yaşayıram. Son iki ildə Azərbaycana tez-tez gəlib-gedirəm. Həmkarlarıma dəstək olmağa çalışıram. Çox sevincliyəm. 30 ölkə arasında Azərbaycan bayrağını dalğalandırmaq böyük uğurdur. İllərimin əziyyətidir.
Hər kəs uğurumuza sevindi. İlk sırada olan qonşularımız, düşmənlərimiz isə yana-yana baxırdılar. Şükür Allaha, qalib olduq. Bunu qazanmaq mənim üçün böyük sərvətdir.

Azərbaycanda həmkarlarım məni sevir, hörmət saxlayırlar. Məşhur stilistlər hamısı gözəl fikirlər yazıblar".

"Bu, ilk müsabiqə idi. Gələn il daha yaxşı hazırlaşacağıq. Həm saç kəsimi, həm rəng, həm də dırnaq və makiyaj olacaq", - sonda C.Babayev əlavə edib.

Telegramda izləyin