"Onlarla erməni əsgərini rahatlıqla əsir götürə bilərik" - Şok açıqlama

"Atalar deyir ki, "qurdla dostluq et, amma çomağı əlindən yerə qoyma". Bizim Ermənistanla dostluğumuz həmişə bu səviyyədə olub. Biz nə vaxt çomağı yerə qoymuşuqsa, İrəvan bir oyun çıxarıb".

Bu sözləri Yenisabah.az-a açıqlamasında politoloq Nadir Şəfiyev deyib.

Analitik 32 erməni hərbçinin Ermənistana qaytarılmasından sonra İrəvanın yenidən sülh sazişi masasından yayınması ehtimalına toxunub.

Xatırladaq ki, bir sıra analitiklər 32 hərbçinin geri qaytarılmasından sonra İrəvanın sülh sazişinin imzalanması məsələsini yenidən tormozlayacağı bağlı iddialar irəli sürüb. Onların fikrincə, mövcud status-kvo Ermənistana sərf edir.

N.Şəfiyevin fikrincə, burada ermənilərin hansısa niyyətləri var ki, biz onu aşkar edib onların əvəzinə söyləyə bilmərik:

"Biz, sadəcə olaraq, öz hərəkətlərimizə, qəbul etdiyimiz qərarlara cavabdeh ola və öz məqsədimizi ortaya qoyub ona doğru irəliliyə bilərik. Bu baxımdan, biz 32 erməni əsiri verib 2 hərbi əsirimizi geri almışıq. Əslində, bunu zəiflik və uduzmaq kimi qiymətləndirənlər də çoxdur ki, 32 erməni yerinə 2 erməniyə 2 azərbaycanlı götürərdik. Niyə bunu etmədik və s?

Mən illər öncə də deyirdim ki, müharibə zamanı, sadəcə və sadəcə, bizim insanların, əsgərlərin və zabitlərin canını qorumaq lazımdır. Mən 1 azərbaycanlımın canını 1000 erməniyə dəyişmərəm. Söhbət də ondan gedir ki, biz 2 ailəni xoşbəxt etmək üçün 32 ermənini buraxdıq. Bu, həm də bizim güc və qüdrətimizi göstərir. Əgər Ermənistan bizim 2 əsgərimizi götürə bilirsə, biz də öz ərazimizdə onlarla erməni əsgərini rahat əsir götürə bilərik".

"O ki qaldı sülh sazişinin imzalanmasına, Azərbaycan əlindən gələni edir ki, bu saziş imzalansın və bundan sonra da əlindən gələni edəcək. Biz, istər ermənilərə, istərsə də onları qoruyan və vasitəçiliyə çalışan qurumların hamısına göstərdik ki, niyyətimiz və istəyimiz safdır. Biz Azərbaycan olaraq, doğrudan da, sülh sazişini istəyirik. Amma bunun üçün biz nə öz maraqlarımzıdan keçən deyilik, nə də ermənilərə güzəştə keçməkdən deyilik. Bunu dəhliz məsələsi də göstərdi. Çünki Azərbaycan əlinin altında daim alternativ vasitələri saxlayır və çox güman ki, sülh danışıqlarında da alternativ vasitələr var", - deyə o, əlavə edib.

Siyasi təhlilçinin qənaətinə görə, bu razılaşmanın çox müsbət bir cəhəti o oldu ki, tərəflər vasitəçisiz öz aralarında danışıb, ortaq məxrəcə gəlib məsələni həll edə bildilər:

"Çünki bu günə kimi vasitəçilər vasitəsilə Bakı və İrəvan demək olar ki, 1 addım da irəliliyə bilməyib. Haradasa razılığa gəliblər, Paşinyan bəyanatlar verib, amma bununla bağlı hansısa irəliləyişə doğru addım atılmamışdı. Amma bu razılaşma tərəflər arasında inamı və gələcəyə ümidi artıran konkret bir irəliləyişdir. Mən bu razılaşmada ən müsbət tərəf kimi 2 ailədə olan sevinci göstərə bilərəm. Bu sevinc dünyaya dəyər bir sevincdir ki, ölkə rəhbərliyi bu addımı ilə o sevinci bəxş etdi".

"Ermənilər sülh sazişi ilə bağlı 3 maddə üzrə Azərbaycanın razılığını istəyirsə, Azərbaycan da 3 maddə üzrə 2 maddənin həyata keçirilməsini tələb edir. Bütün bu amillər üçün, sadəcə, 1 həftə vaxt və Ermənistanın razılığı lazımdır. Əgər ermənilər bu prinsiplərlə razılaşalar, Yeni ildən əvvəl də bu sazişi imzalamaq olar. Ermənistanın qoltuğunun altına qarpız yığan dövlətlər bir gün əlini çəksələr və biz İrəvanla üzbəüz söhbət etsək, onların özü dərhal həmin sazişi imzalayar. Çünki onların başqa cür rahat yaşamaq imkanı yoxdur", - o, fikirlərini yekunlaşdırıb.

Telegramda izləyin