Kredit borcunu ödəyə bilməyən şəxslər hansı halda həbs edilə bilər? - AÇIQLAMA

Maliyyə vəziyyətinizdə yaşaya biləcəyiniz mənfi dəyişikliklər kredit borcunuzu ödəməkdə çətinlik çəkməyinizə səbəb ola bilər. Kredit aldığınız zaman bankla bağladığınız müqaviləyə ödəniş planı daxildir. Kredit taksitləri bu planın şərtlərinə uyğun olaraq ödənilməlidir. Əks halda borcunuzu faizlə artırmaq və kredit hesabınıza zərər vurmaq kimi problemlərlə qarşılaşa bilərsiniz. Burada isə bir sual yaranır. Kredit borcunu ödəyə bilməyən şəxslər hansı hallarda həbs edilə bilər.

Mövzu ilə bağlı bank məsələləri üzrə ekspert, hüquqşünas Əkrəm Həsənov Sonxeber.az-a açıqlama verib:

"Kredit götürən şəxs vətəndaşdırsa heç bir halda həbs edilə bilməz. Şirkət rəhbərləri və sahibkarlar kreditdən təyinatı üzrə istifadə etməsələr, yəni müqavilə göstərilən şərtləri yerinə yetirmirsə barəsində tədbirlər görülə bilər. Məsələn tutaq ki, vətəndaş deyir krediti ev tikmək üçün istəyirəm. Amma gedir başqa işə görə vəsaiti xərcləyir. Bu da o deməkdir ki, kredit götürən şəxs bağlanan müqaviləyə əməl etmir. Bundan başqa, krediti vətəndaş yaxud şirkət qaytarmırsa, məhkəməyə verilir. Barəsində qərar çıxır ki, ödəməlidir. Əgər pulu olduğu halda yayınırsa, o zaman 3 il azadlıqdan məhrum edilə bilər. Buradakı məqam isə çox vacib məsələdir. Pulunun olmasını sübut etməlidirlər. İmkanı var və ödəmir. Bu halda mümkündür. Amma ki, imkanı yoxdursa və ödəmirsə həbs oluna bilməz. Bununla bağlı Avropa İnsan Haqları Məhkəməsinin 2021-ci il 22 iyul tarixli qərarı var. Avropa məhkəməsi deyir ki, dövlət sübut etməlidir ki, bu adamların imkanı var. Buna baxmayaraq, Azərbaycanda hələ də həbslər olub. Bunlar isə qanunsuzdur".

Sevda Səfərova

Telegramda izləyin