Ucu-bucağı görünməyən TIXACLAR: "Bakıda alternativ yol yoxdur, küçələr tikinti meydançasına çevrilib, bu barədə DÜŞÜNÜLMƏYİB "

 Bakıda demək olar ki, hər gün tıxac yaşanır. Ucu-bucağı görünməyən tıxaclar əsasən səhər və axşam saatlarında müşahidə olunur. Bəs bunun səbəbi nədir? Bu problem necə aradan qaldırıla bilər?

Məsələ ilə bağlı nəqliyyat üzrə ekspert Elməddin Muradlı  Sonxeber.az-a açıqlama verib.

O bildirib ki, Bakıda alternativ yollar yoxdur:

"Bəzi küçələrdə hərəkətin intensivliyi müəyyən qədər nəqliyyat sıxlığına səbəb olur. Çünki alternativ yollarımız çox azdır. Vaxtı ikən isə bu barədə düşünülməyib.  Bir çox küçələr tikinti meydançasına çevrilib. Belə olan halda da sıxlıq yaranır. Çünki yol şəbəkəsi vaxtında düzgün qurulmayıb. Bununla paralel həm də ictimai nəqliyyat məsələsi arxa planda qalıb. Burada ciddi şəkildə inkişafdan danışmaq olmur.  İctimai nəqliyyatın vəziyyəti ağırlaşdığı üçün,  insanlar  şəxsi avtomobillərə və  taksilərə üstünlük verib.  Nəticədə bu gün şəxsi avtomobil və taksilərin sayı həddən artıq çoxdur.  Bu da öz təsirini göstərir".

Ekspert problemin həlli yollarına da toxunub:

"Bəzi addımlar atmaqla vəziyyətdən çıxmaq mümkündür.  Bakının baş planı hazırlanıb. Müəyyən layihələrin icrası gözlənilir. Bu layihədə həm də ictimai nəqliyyat yeni yolların salınması gündəmdədir. Bu proses 2040 ilə qədər davam edəcək. Bu ilə qədər meteostansiyaların sayından tutmuş, yeni yolların çəkilməsi planlaşdırılır. Gələcək zamanda bu prosesin müsbətə doğru dəyişməsinin şahidi olacağıq. Bu istiqamətdə də müəyyən layihələrin artıq  olduğunu görürük. İndiki halda Bakıda tıxaca səbəb olan hallar yalnız taksilər və avtomobillər deyil. Şəhərsalmadan tutmuş, metro stansiyalarımın sayı az olmasına qədər bu prosesdə payı var"

Gülcahan Məmmədova

Telegramda izləyin