Azərbaycanda dollara tələb niyə kəskin artıb?

"Fevralın son hərracında dollara tələb müqayisəli olaraq azalsa da, valyuta bazarı üçün ötən ay heç də asan olmadı. Fevral ayında hərraclarda 870,6 milyon dollarlıq sifariş qeydə alınıb ki, bu da əvvəlki ilin eyni ayı ilə müqayisədə 2,6 dəfə çoxdur".

"Qafqazinfo" xəbər verir ki, bunu Milli Məclisin iqtisadçı deputatı Vüqar Bayramov hərraclarda dollara tələbin artmasına dair şərhində bildirib.

Deputatın sözlərinə görə, bu ilin ilk 2 ayında hərraclarda 1 milyard 287,6 milyon dollar satılıb ki, bu da 2023-cü ilin uyğun dövrü ilə müqayisədə 2.4 dəfə çoxdur:

"Sonuncu hərracda 80 milyon dollarlıq sifariş ondan xəbər verir ki, valyuta bazarındakı volatilik bu ay optimallaşdırıla bilər. Qeyd edək ki, ondan əvvəlki 5 hərracın hər birində tələb 3 rəqəmli, yəni 100 milyon dollardan çox olub. Bununla belə, mart ayında da bayram, qeyri-iş günlərinin sayını və potensial idxal həcmini nəzərə alsaq, dollara tələbin kəskin azalmayacağı istisna deyil".

Parlamentari qeyd edib ki, əvvəlki illərdə fevral ayında adətən sakitlik müşahidə edilib:

"Mərkəzi Bank fevral ayında dollara tələbin artmasının daha çox mövsümi faktorlarla bağlı olduğunu bəyan edib. Mövsümi faktorlar həmin dövrə uyğun olaraq daha çox təbii yaranan səbəblər kimi nəzərdə tutulsa da, əvvəlki illərin fevral aylarında valyuta bazarında hər zaman sakitlik müşahidə olunub. Bu isə ondan xəbər verir ki, fevralda valyutaya tələbin kəskin artmasının digər iqtisadi və psixoloji səbəbləri var.

Belə ki, 2023-cü il fevralında hərraclarda cəmi 326.5 milyon, 2022-ci ilin eyni ayında 371.3 milyon və 2021-ci ilin həmin ayında isə 437.4 milyon dollar satılıb. Bu il fevralında isə bu rəqəm 870.6 milyon dollar olub. Göründüyü kimi, 2024-cü ilin fevral ayında müşahidə edilən kəskin artım əvvəlki 3 ilin ferval aylarında qeydə alınmayıb".

"Azərbaycanda idxalın artması da dollara tələbi yüksəldir. Belə ki, 2023-cü ildə idxal 17 milyard 285 milyon dollara çatıb. İdxal isə valyuta tələbi deməkdir. Tələbi optimallaşdırmaq üçün isə bazarın valyuta təklifinin artırılmasına və şaxələndirilməsinə ciddi ehtiyac var", - V.Bayramov əlavə edib.

Telegramda izləyin