Saxlanılan şəxslərin ifadəsini mətbuata yayan şəxsləri HANSI CƏZA GÖZLƏYİR? - AÇIQLAMA

Şübhəli yaxud təqsirləndirilən şəxs istintaq altında olan cinayətlə bağlı hüquq-mühafizə orqanlarının əməkdaşları yaxud dövlət ittihamçısı tərəfindən dinlənilir. İstintaq mərhələsində ifadənin qəbulu başqa şəxslər tərəfindən həyata keçirilə bilməz. Azərbaycanda istintaq mərhələsində şəxslərin ifadəsinin mətbuata yayılması hallarını görmüşük. Bu nə dərəcədə doğrudur? Saxlanılan, təqsirləndirilən şəxslərin ifadəsini yayan şəxsləri qanunvericiliklə hansı cəza gözəyir?

Mövzu ilə bağlı Siyasi və Hüquqi Araşdırmalar Mərkəzinin (SHAM) sədri Xəyal Bəşirov Sonxeber.az-a açıqlamasında deyib ki, şübhəli yaxud təqsirləndirilən şəxslər olur. Həmin şəxslər haqqında ibtidai araşdırma aparılır. Buna həmin şəxslərin icazəsi olmadan demək olmaz.

"Çünki Azərbaycan qanunvericiliyinə görə, Cinayət Məcəlləsinin 300-cü maddəsinə görə təhqiqat və ibtidai istintaq məlumatlarını yayma maddəsi var. Həmin o maddənin təsiri altına düşən addımlar atırlarsa, məsuliyyət yaradır. Bu zaman qeyd olunan şəxs üçün deyil, cinayət işi materialları ilə bağlı gələcəkdə ibtidai istintaqa maneəçilik yaxud digər hallarda gedişata mənfi təsir göstərə biləcək hallar üçün bu müddəa qanunvericilikdə var. Təsəvvür edin ki, kimləsə bağlı cinayət işi aparılır. Həmin şəxsin cinayət işi ilə bağlı verilən məlumatlar yayılırsa, həmin cinayət işi ilə bağlı şəxslər axtarıla bilər".

Xəyal Bəşirovun sözlərinə görə, cinayət işinin gedişatında digər sübutlar ola bilər. Kimlərsə bu məlumatları öyrənib, sübutların saxtalaşdırılması ilə bağlı addımlar ata bilərlər:

"Kimlərsə bu məlumatları öyrənib, sübutların saxtalaşdırılması ilə bağlı addımlar ata bilərlər. Axtarıla biləcək şəxslər ilə bağlı məlumat yayılacaqsa, həmin şəxslərin ibtidai istintaqdan gizlənməsi ilə bağlı işlər görülür. Təhqiqat və ibtidai istintaq məlumatlarının yayılması qanunla qadağandır. Həmin məlumatı yayan şəxslər 1000 manatdan - 2000 manata qədər cərimə, 2 ilə qədər islah işləri, 6 aya qədər azadlıqdan məhrumetmə cəzasına məhkum edilə bilər. Hesab edirəm ki, bu məsələ çox ciddidir. Bu normaya mütləq şəkildə əmək etmək lazımdır. Məlumatları yayan şəxslərin niyyətləri arxasında başqa məqsəd dayanırsa, o məqsədlər ilə bağlı məsuliyyətə cəlb edilə bilərlər. Hər bir halda bu məlumatların yayılması məsuliyyət tədbirini yaradır".

Sevda Səfərova

Telegramda izləyin