İntihar edən əsgərlərin komandirlərini hansı CƏZA GÖZLƏYİR? - AÇIQLAMA

Xəbər verdiyimiz kimi, Müdafiə Nazirliyinin N saylı hərbi hissəsinin hərbi qulluqçusu, əsgər Musa Ehtiram oğlu Eyvazlının odlu silahdan istifadə etməklə özünü öldürməsi barədə Şəmkir Hərbi Prokurorluğuna məlumat daxil olub. Hərbi qulluqçular arasında intihar haları ciddi məsələdir və həm də hüquqi əhəmiyyət kəsb edir. Əsgərə nəzarət onun tabe olduğu komandirlərə aiddir. Bəs əsgər intihar edirsə, komandirlərini hansı cəza gözləyir?

Mövzu ilə bağlı hərbi ekspert Elxan Şıxəliyev Sonxeber.az-a açıqlamasında deyib ki, Azərbaycan Silahlı Qüvvələrində qarşılıqlı münasibətlərin pozulması fonunda yaxud özəl bir səbəbdən hərbçilərin, əsgərlərin intihar etməsi halları müşahidə olunur:

"Hər bir intihar hadisəsi hüquq-mühafizə orqanları tərəfindən araşdırılır. Hüquq-mühafizə orqanlarının araşdırması səbəbin aydınlaşdırılması ilə nəticələnir. Əgər aydın olursa ki, intihar edən şəxsi intihara təhrik etmə, intihara məcburetmə tərəfi varsa, məsul şəxs cinayət məsuliyyətinə cəlb olunur. Yəni hər hansı bir hərbçi yoldaşı yaxud komandirlərin qarşılıqlı münasibətlərin, hərbi nizamnamələrin kobud şəkildə pozulması nəticəsində əsgərin intihar hadisəsi baş verirsə, həmin şəxslər cəzalandırılır. Əgər hərbi prokurorluq müəyyən etsə ki, hərbçinin intiharında komandirlərin cinayət tərkibli fəaliyyəti olubsa, onlar məsuliyyət daşıyırlar. Yəni bu sırf Cinayət Məcəlləsinə, uyğun adekvat cəza alması ilə nəticələnməsi halıdır".

Ekspertin sözlərinə görə, komandirlərin birbaşa intiharda yolu yoxdursa belə, əsgərə nəzarət isə onların məsuliyyətindədir. Bu zaman intihar hadisəsibaş verirsə komandirlər "Azərbaycan Respublikası Silahlı Qüvvələrinin Daxili xidmət nizamnaməsi"nə uyğun olaraq cəzalandırılır:

"Burada verilən cəzalar nizamnamədə öz əksini tapıb. Hətta komandir burada iştirakçıdırsa, onların həbsinə qədər addımlar atıla bilər. Hərbçilərin arasında qarşılıqlı nizamnamənin pozulması halı olarsa, digər hərbçi cinayət məsuliyyətinə cəlb olunur. Yox əgər ailəsində, özəl səbəblərdən dolayı intihar baş verirsə, bu zaman komandirlər "Azərbaycan Respublikası Silahlı Qüvvələrinin Daxili xidmət nizamnaməsi"nin tələblərinə uyğun olaraq cəzalandırılır. Amma bu Cinayət Məcəlləsinə uyğun olan bir hal deyil. Ona görə də, hər bir intihar hadisəsi fərdi şəkildə axıra qədər araşdırılır və aydınlaşdırılır. Tərəflər və səbəbkarlar varsa onlar mütləq iki qayda ilə cəzalandırılır: cinayət məsuliyyəti və "Azərbaycan Respublikası Silahlı Qüvvələrinin Daxili xidmət nizamnaməsi". Heç kim onları buna görə başlarını sığallamır. Hər bir halda gördükləri işlərə görə cəzalandırma var".

Xatırladaq ki, baş vermiş intihar hadisəsi üzrə Şəmkir Hərbi Prokurorluğunda Cinayət Məcəlləsinin müvafiq maddəsi ilə cinayət işi başlanılaraq şahidlər dindirilib, müxtəlif ekspertizalar təyin edilərək, icraya yönəldilib və təxirəsalınmaz zəruri istintaq hərəkətləri həyata keçirilib. Hazırda istintaq davam etdirilir və qanunvericiliyin tələblərinə uyğun olaraq bütün tədbirlərin görülməsi təmin olunacaq.

Sevda Səfərova

Telegramda izləyin