Təxribatlar davam edərsə, Kərki uğrunda hərbi əməliyyatlar BAŞLAYACAQ? - AÇIQLAMA

Xəbər verdiyimiz kimi, Ermənistan silahlı qüvvələrinin bölmələri Dəvəli rayonunun Arazdəyən, Qarakilsə rayonunun Saybalı yaşayış məntəqələri istiqamətlərində yerləşən mövqelərindən Azərbaycan Ordusunun Naxçıvan Muxtar Respublikasının Sədərək rayonunun Heydərabad və Şahbuz rayonunun Biçənək yaşayış məntəqələri istiqamətlərindəki mövqelərini atıcı silahlardan fasilələrlə atəşə tutub. Burada bir sıra maraqlı suallar yaranır. Atəşə tutulan ərazilər Azərbaycanın anklavı olan Kərkiyə daha yaxındır. Strateji əhəmiyyətə malik olan Kərki kəndini isə Ermənistan geri verilməməsində inad edir. Naxçıvan istiqamətində təxribatlar davam edərsə, Kərki hərbi əməliyyatlar yolu ilə geri qaytarıla bilər?

Mövzu ilə bağlı hərbi ekspert Səxavət Məmməd Sonxeber.az-a açıqlamasında bildirib ki, Ermənistan Naxçıvan istiqamətində atəşkəsin mövqelərimizin atəşə tutulması ilə bağlı belə bir bəyanat verdi ki, onlar tərəfindən sözügedən ərazilərdə atəşkəs pozulmayıb. Atəşkəsin bu istiqamətdə pozulması ilə bağlı bir sıra suallar yaranır:

"Ermənistan burada atəşkəsi pozmaqla nəyə nail olmaq istəyir yaxud nələr baş verə bilər? Burada bir nüans var. Buradan Ermənistan nə qazanacaq? Bunun heç bir hüquqi əsası yoxdur. Faktiki olaraq Naxçıvan Türkiyə tərəfindən Qars müqaviləsi ilə qorunur. Yəni Ermənistan burada qarşısına Türkiyəni almaq istəyir? Ona görə hesab edirəm ki, indiki məqamda Ermənistanın atəşkəsi Naxçıvan istiqamətində atəşkəsi pozması və hər hansısa addımlar atması heç bir ciddi təhlükə törətmir. Çünki Naxçıvan istiqamətində hücumlar intensivləşərsə, bu Ermənistan üçün intihar olar".

Ekspertin sözlərinə görə, sözügedən ərazilər Kərki anklavına yaxındır. İlk növbədə iki dövlət arasında son ışıqlar əsasən Qazaxın 4 kəndi ilə bağlıdır. Qazaxın 4 kəndinin verilmə ehtimalı nə qədər yüksəkdir, biz buna baxmalıyıq:

"Azərbaycan tərəfi hesab edirəm ki, anklavdan öncəki bu istiqamət üzrə hərəkət edə bilər. Amma bir məsələ var. Sülh müqaviləsi imzalanmayana qədər mən bu regionda və bölgədə müharibə ehtimalının daim gündəmdə qalacağın düşünürəm. Bu proseslərin arxasında başqa güclər var. Həmin qüvvələrin isə özünün maraqları var. Düşünürəm ki, uzlaşma əldə olunmayana qədər mütləq şəkildə müharibə baş verə bilər. Bu son dərəcə gözləniləndir. Amma bunun nəticələrini hesablamaq lazımdır. Müharibə bitsə belə, sanksiyaların tətbiq edilməsi variantı var. Bu istiqamət üzrə yaxşı fikirləşmək lazımdır. İndiki məqamda müharibənin olması üçün şərtlər və zaman çox önəmlidir. Aktiv əməliyyatlar baş verəcəksə, aprel ayında bu olmayacaq. Müharibə ehtimalı olsa belə, ən azından ABŞ-də seçkilər ərəfəsində baş verəcək".

Sevda Səfərova

Telegramda izləyin