"İran və Azərbaycan arasındakı dostluq münasibətləri bundan sonra da davam edəcək" - DEPUTAT

"İran İslam Respublikasının Prezidenti Seyid İbrahim Rəisinin, xarici işlər naziri Hüseyn Əmir-Abdullahianın və digər müşayiət edən şəxslərin helikopter qəzasında faciəli surətdə həlak olması bizi dərindən üzdü".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, İran və Azərbaycan arasındakı dostluq münasibətləri bundan sonra da davam edəcək:

"Bu gün Azərbaycanla İran arasındakı gərginlik aradan qalxıb. Mayın 19-da Azərbaycan Respublikası ilə İran İslam Respublikasının dövlət sərhədində Azərbaycan Respublikasının Prezidenti İlham Əliyevin İran İslam Respublikasının Prezidenti Seyid İbrahim Rəisi ilə görüşü bunu bir daha sübut etdi. Azərbaycan səfirliyinə edilən hücumdan sonra İran tərəfi ilə müəyyən soyuqluq yaranmışdı. Amma artıq demək olar ki, iki ölkə arasındakı problrmlər aradan qaldırılıb. İranda yenidən Azərbaycan səfirliyi fəaliyyətə başlayacaq. Səfirliyimizin Tehranda yeni bir ərazidə fəaliyyətə başlaması gözlənilir".

Deputat qeyd edib ki, Azərbaycan və İran rəhbərlərinin sərhəddəki görüşdə verdiyi açıqlamalar iki ölkə arasındakı dostluq münasibətlərin bundan sonra da davam etməsinin zəruriliyini bir daha ortaya qoydu:

"Azərbaycan-İran arasındakı dostluq münasibətləri region üçün müstəsna əhəmiyyətə malikdir. Bu baxımdan da hesab edirəm ki,mayın 19-da baş tutan görüşdən sonra iki ölkə arasındakı münasibətlərdə yeni bir mərhələ başlayır".

Telegramda izləyin