"Avropa İttifaqının Ermənistana hərbi yardım göndərməsi regionda gərginliyin artmasına xidmət edir" - DEPUTAT

"Avropa İttifaqı Şurası Ermənistan Silahlı Qüvvələrinə dəstək üçün 10 milyon avro məbləğində yardım ayırmaq barədə qərar qəbul etməsi və ABŞ ilə Ermənistanın "Eagle Partner 2024" proqramı çərçivəsində birgə hərbi təlimləri birbaşa regionda yenidən müharibəni alovlandırılması xidmət edir".

Bunu Sonxeber.az-a danışan deputat İqbal Məmmədov bildirib.

Deputat qeyd edib ki, Avropa İttifaqının Ermənistana hərbi yardım göndərməsi qərarı təhlükəlidir və regionda gərginliyin artmasına səbəb ola bilər:

"Avropa İttifaqı tərəfindən bu kimi fəaliyyətlər açıq şəkildə ölkəmizə qarşı yönələn növbəti təxribatdır. Ayrılan yardım torpaqlarımızın 20 faizini 30 ilə yaxın dövrdə işğal altında saxlayan və hal-hazırda da ərazi bütövlüyümüzə qarşı iddialardan əl çəkməyən Ermənistanın hərbi potensialını gücləndirməyə və bölgədə vəziyyəti yenidən gərginləşdirməyə xidmət edəcək. Avropa İttifaqı regionda sülh və əmin-amanlığı təhlükəyə atan bu kimi addımlara son qoymalıdır. Bundan sonra Ermənistanın sabitliyi pozan hər hansı mümkün təxribatına görə ABŞ və Avropa İttifaqı da məsuliyyət daşıyacaq".

Deputat vurğulayıb ki, Ermənistan rəhbərliyi anlamalıdır ki, xalqının firavan yaşamasının tək yolu sülh müqaviləsini imzalamaqdır:

"Yaxşı olar ki, Paşinyan 44 günlük Vətən müharibəsində və antiterror əməliyyatları zamanı ordusunun biabırçı məğlubiyyətini unutmasın. Növbəti müharibənin başlanması Ermənistanın dövlət kimi varlığını şübhə altına ata bilər".

Telegramda izləyin