Azərbaycanda hərbi xidmətə çağırış yaşı 19-a QALDIRILSIN - TƏKLİF

Xəbər verdiyimiz kimi, qəbul imtahanlarında 27227 abituriyent ali məktəblərə qəbul olmadı. Onların əksəriyyəti universitetə qəbul olmağın başqa yollarını axtarırlar. İllərdir bazarda olanlar, sonradan bu sahəyə gəlir məqsədilə yanaşanlar bu məqamda ortaya çıxır və diqqətçəkən kampaniyalara start verirlər. Maraqlı təkliflər ilə müştəri gözü ilə abituriyentləri razı salmağı da bacarırlar.

Bu gün ölkəmizdə hər xarici universitetin diplomu tanınmır. Bu baxımdan bir çox ekspertlər xaricdə təhsil almağı əlavə xərc olaraq qiymətləndirir. Ali məktəblərə qəbul ola bilməyən abituriyentlər, xüsusilə də oğlanlar bu yollara üz tuturlar. Bu baxımdan ali məktəbə qəbul ola bilməyən oğlanlara universitetə daxil olmaları üçün 1 il möhlət verilə bilər?

Mövzu ilə bağlı təhsil məsələləri üzrə ekspert Vüsal Kərimli Sonxeber.az-a açıqlama verib:

"Bu mövzu hər zaman aktualdır. Düşünürəm ki, bu gün ali məktəblərə qəbul ola bilməyənlər həddindən artır xaricə ölkələrə müraciət edirlər. Sonda isə onların diplomları tanınmır. Onlar həm vaxt itirirlər, həm də əlavə maliyyə çıxır. Bu baxımdan hesab edirəm ki, əsgərliyə yaş 19-a artırılmalıdır. Belə olsa daha yaxşı olardı. Ən azından bu il qəbul ola bilməyən tələbələrin növbəti ildə qəbul olmaq şansları ola bilər".

Saytımıza öz fikirlərini bölüşən hərbi ekspert Üzeyir Cəfərli deyib ki, bu il ali məktəblərə qəbul ola bilməyən gənclərim 18 yaşı tamam olduğuna görə hərbi xidmətə cəlb olunacaqlar. Proseslər isə Azərbaycan qanunvericiliyi ilə tənzimlənir:

"Bir il yarım hərbi xidmətdə olduğu müddətdə 11 ildə əldə edilən biliklər xeyli yaddan çıxır. Hərbi xidmət dönəmində onlar öz biliklərini qaydasında saxlamaq və təkmilləşdirmək imkanları olmur. Sonradan bu müəyyən problemlər yaradır. Bəziləri təhsil almaq yaxud təhsillərini davam etdirmək üçün cəhdlər edirlər. Buna şərait yaratmaq lazımdır. Azərbaycanda çağırışçı kontingenti ilə bağlı say problemi yoxdur. Dövlət Statistika Komitəsinin son məlumatları onu deməyə əsas verir ki, biz də kifayət qədər oğlan uşaqları var. Həmin uşaqların hesabına ordunu kifayət qədər çağırışçı ilə təmin edə bilirik".

Ekspertin sözlərinə görə, gənclərin xaricdə təhsil alması üçün dövlət sərhədini keçmək üçün müvafiq sənəd tələb olunur:

"Gənclərimiz müxtəlif yollarla xaricə üz tuturdular. Bəzi ali məktəblərə ödənişli yaxud ödənişsiz daxil olurdular. Bu zaman onların diplomu tanınmırdı. Beləcə həm uşaqlar maddi cəhətdən ziyan görür, faktiki olaraq böyük zərbə alırdılar. Bu gün yüksək vəzifədə olan bəzi şəxslər var ki, zamanında fürsətdən istifadə edib Rusiya universitetlərinin saxta diplomlarını əldə ediblər. İndi də bu proses davam edir. Ən azından növbəti ilə qədər ali məktəblərə qəbul ola bilməyən gənclərimizə 1 il möhlət hüququ verilsin. Onlar bu zaman biliklərini itirməzlər və hazırlıq keçə biləcəklər. Ona görə də belə bir güzəştin verilməsinin tərəfdarıyam. Deputatların əksəriyyəti heç hərbi xidmətdə olmayıb. Onlar heç vaxt başa düşmürlər ki, millətin gələcəyi onun ağıllı və hazırlıqlı gələcəyindən asılıdır. Cəmiyyətimizdə gənclərimizə bu şərait yaradılmalıdır. Bəziləri bu məsələlərdə guya prinsipiallıq nümayiş etdirdiklərini deyirlər. 35 yaşına qədər bu insanlar hərbi xidmət keçə bilərlər. Millətə savadlı gənclər lazımdır və onlara bu şərait yaradılmalıdır".

Sevda Səfərova

Telegramda izləyin