"Olduqca ciddi, cavabsız suallar mövcuddur" - POLİTOLOQ

"Azərbaycan Prezidenti İlham Əliyevin qəzaya uğrayan təyyarənin "qara qutu"larının açılmasına və oradakı məlumatların təhlil olunmasına xüsusi önəm verməsinin olduqca ciddi səbəbləri mövcuddur. Çünki, "qara qutu" təyyarənin üzləşdiyi situasiya, qəzanın səbəbləri ilə bağlı daha detallı məlumatları özündə saxlayır. Bu məlumatlar açıldıqdan sonra bir çox qaranlıq suallara cavab tapılacaq".

Bunu Sonxeber.az-a politoloq Elçin Xalidbəyli danışıb.

O, açıqlamasında qeyd edib ki, "qara qutu"larda olan məlumatlar hazırda müəmmalı xarakter daşıyan bir çox sualların cavabını tapmaqda kömək edəcək əsas vasitədir:

"Onu da nəzərə almaq lazımdır ki, Azərbaycan Prezidenti İlham Əliyevin də qeyd etdiyi kimi, Azərbaycan təyyarəsinin qəzaya uğraması ətrafında olduqca ciddi və çoxsaylı suallar mövcuddur. Sualların hər birinin ayrı-ayrılıqda detallı cavablandırılması vacibdir. Xüsusilə təyyarənin Qroznidə yerə endirilməkdən imtina edilməsi və hadisənin hansı vəziyyətdə baş verməsi ilə bağlı suallara cavab tapılması lazımdır.

Eyni zamanda təyyarənin yaxınlıqdakı hava limanlarına deyil, daha təhlükəli və riskli marşrut olan Aktau istiqamətinə yönləndirilməsinin səbəbləri aydınlaşdırılmalıdır. Çünki burada Azərbaycan təyyarəsi məqsədyönlü şəkildə vurulubsa, onda təyyarəni Aktauya yönləndirməklə onun dənizə düşməsini istəyiblər və bununla da hərbi cinayətin üstünün ört-basdır edilməsinə cəhd göstəriblər.

Olduqca ciddi, cavabsız suallar mövcuddur. Bu baxımdan Azərbaycan Respublikasının Prezidenti İlham Əliyevin "qara qutu"ların açılmasına və oradakı məlumatların təhlil olunmasına xüsusi önəm verməsi tamamilə başa düşüləndir. Çünki məhz "qara qutu"larda olan məlumatlar hazırda müəmmalı xarakter daşıyan bir çox sualların cavabını tapmaqda kömək edəcək vasitədir".

Vüsalə İbrahimli

Telegramda izləyin