"Rusiya qəzaya səbəb olan şəxsləri cəzalandırmalı və dəymiş ziyana görə Azərbaycana təzminat ödəməlidir" - DEPUTAT

"Bu gün Cənab Prezidentin söylədiyi fikirlər, verdiyi müsahibələr sırf Azərbaycanın milli maraqlarının qorunması üçün atdığı addımlardır. Çünki, AZAL-ın Bakı-Qroznı reysini həyata keçirən "Embraer 190 AR" təyyarəsinin Qazaxıstanın Aktau şəhəri yaxınlığında qəzaya uğraması nəticəsində Azərbaycana həm maddi və texniki ziyan dəyib, həm də vətəndaşlarımız həlak olub. Ən önəmlisi isə Azərbaycan-Rusiya dostluğuna və strateji əməkdaşlığına zərbə dəyib".

Bunu Sonxeber.az-a deputat Fariz İsmayılzadə danışıb.

Deputat açıqlamasında qeyd edib ki, Azərbaycan hər zaman öz milli maraqlarına uyğun siyasət yeridib:

"Cənab Prezident İlham Əliyev üçün dövlətimizin və xalqımızın milli maraqları daim hər şeydən üstün olub.

Bizim gözləntimiz, tələblərimiz ondan ibarətdir ki, Rusiya bu faciədə cavabdeh olan insanları cəzalandırsın və dəymiş ziyana görə təzminat ödəsin. Cənab Prezident İlham Əliyev həlak olan ekipaj heyətinin ailə üzvləri və sağ qalan təyyarə bələdçiləri ilə görüşündə səsləndirdiyi fikirlər də məhz, Azərbaycanın milli maraqlarının qorunmasına yönəlib.

Azərbaycan bütün qonşu ölkələrlə ikitərəfli və bərabər əsaslarla münasibət qurmağa hazırdır. Lakin, öz milli maraqlarının da tapdalanmağına imkan vermir, vətəndaşların qorunmasına yönəlik siyasət yeridir. Eyni zamanda bunu öz qonşularından da gözləyir ki, onlar da öz həcminə və ərazisinə baxmayaraq, Azərbaycana hörmətlə və beynəlxalq hüquqa əsaslanmış addımlarla davransın. Təəssüf ki, Rusiya bu məsələdə özünü müttəfiq kimi aparmayıb.Ümid edək ki, Rusiya qısa müddət ərzində qəzaya səbəb olan şəxsləri cəzalandıracaq və dəymiş ziyana görə Azərbaycana, qəza nəticəsində həlak olan şəxslərin ailələrinə təzminat ödəyəcək".

Vüsalə İbrahimli

Telegramda izləyin