Azərbaycanda narkotik vasitələrin istehsalı və satışına görə ömürlük həbs cəzası tətbiq edilə bilərmi? - AÇIQLAMA

Qazaxıstan Prezidenti Kasım-Jomart Tokayev əvvəllər parlament tərəfindən təsdiq edilmiş, narkotik vasitələrin istehsalı və satışına görə ömürlük həbsə qədər cəzaları sərtləşdirən qanunu imzalayıb.

Qanun narkotik vasitələrin yayılmasına görə vəzifəli şəxslərin cinayət məsuliyyətini də sərtləşdirib.

Sözügedən cinayətlərdə ittiham olunan şəxsləri əmlakı müsadirə olunmaqla 15 ildən 20 ilədək müddətə azadlıqdan məhrum etmə və ya ömürlük azadlıqdan məhrum etmə cəzası gözləyir.

Bəs görəsən Azərbaycanda da narkotik vasitələrin istehsalı və satışına görə ömürlük həbs cəzası tətbiq edilə bilərmi?

Mövzu ilə bağlı sabiq polis rəisi Şəmsəddin Əliyev Sonxeber.az – a açıqlama verib:

"Görünür Qazaxıstanda narkotik vasitələrin qanunsuz dövriyyəsi ilə bağlı vəziyyət həyəcan təbili çalacaq həddədir. Azərbaycan isə son bir-neçə il ərzində bu sahədə kifayət qədər inqilab addımlar atıb. Ölkəmizdə narkotiklə prinsipial mübarizə gedir. Bu mübarizə beynəlxalq aləmin də bu sahədə olan normalarını özündə ehtiva edir. Ümumiyyətlə, bəzən cəzaların sərtliyi müəyyən mənada cinayətlərin qarşısını almaqda səmərəli olmur. Amma təbii ki, bəzi ağır növ cinayətlərin qarşısını almaqda da sərt cəzalar tətbiq edilməlidir.
Mən düşünürəm ki, qəsdən adam öldürməyə, xüsusi amansızlıqlarla törədilən cinayətlərə, uşaq qətllərinə qarşı müstəsna cəza tədbirləri, hətta, ölüm hökmü lazımdır. Amma ömürlük həbs cəzası isə o deməkdir ki, məhkumun həyatının geri qalan hissəsində müəyyən mənada dövlət ona baxmalı olacaq. Həmin məhkumun yeməyi, geyimi, təmizliyi dövlət tərəfindən təmin olunacaq. Təbii ki, bu dövlətin öz vətəndaşına olan münasibətinin təzahürüdür. Amma düşünürəm ki, bir vətəndaş bilərək hər hansı cinayəti törədirsə, dövlətin onu himayə etməsi elə də doğru deyil.
Biz çalışmalıyıq ki, məhkumlar islah olunsun, cəzasını çəkib bitirdikdən sonra azadlığa çıxanda eyni əməlləri təkrarlamasın. Bütün xərcləri də buna yönəltmək lazımdır.
Bizim cinayət məcəlləmizin 235-ci maddəsində narkotik vasitələri talama və hədə-qorxu ilə tələb etmə cinayətini iki dəfədən çox törədən şəxslərin 8-15 ilədək azadlıqdan məhrum etmə cəzası var. Əgər ehtiyac olarsa, bu cəza 20 il və ya ömürlük tətbiq edilə bilər".

Çiçək Sadatova

Telegramda izləyin