KİV: Ukraynadakı müharibənin sülh yolu ilə həlli perspektivləri qeyri-müəyyən olaraq qalır

ABŞ-nin yeni seçilmiş prezidenti Donald Trampın razılığın əldə olunmasının mümkünlüyü barədə bəyanatlarına baxmayaraq, Ukraynadakı müharibənin sülh yolu ilə həlli perspektivləri qeyri-müəyyən olaraq qalır.

"Report" xəbər verir ki, bu barədə "Associated Press" nəşri yazıb.

Bildirilib ki, Trampın vəzifəsinin icrasına hazırlaşdığı vaxtda həm Rusiya, həm də Ukrayna təsir imkanlarını artırmağa, döyüş meydanında mövqelərini gücləndirir:

"Hər iki tərəf kompromis üçün çox az yer olan sərt danışıqlar mövqeləri tutub. Qanunsuz ilhaq edilmiş Krım da daxil olmaqla Ukrayna ərazisinin təxminən 20%-nə nəzarət edən Rusiya, xüsusilə 2024-cü ilin payızında əhəmiyyətli irəliləyişlərlə döyüş meydanında təşəbbüsü qoruyur".

Qeyd olunub ki, Ukrayna hərbi ehtiyatlarını artırmaqda çətinlik çəkir: "Səfərbərlik səviyyəsinin aşağı düşməsi və piyadaların gücünün azalması Ukraynanın davamlı təzyiqlərə tab gətirmək qabiliyyətini azaldır".

Xatırladaq ki, Rusiya ilə Ukrayna arasında müharibə 2022-ci il fevralın 24-də başlayıb. Tramp andiçmə mərasimindən sonra savaşı bitirmək üçün çalışacağını deyib. Ukrayna Prezidenti Volodimir Zelenski isə daha əvvəl söyləyib ki, müharibənin bu il başa çatması üçün hər şeyi edəcək.

Telegramda izləyin