Dünyanın ən yaşlı qadını 122 yaşında vəfat edib - VİDEO

Çinin Fujian əyalətində yaşayan Lin Şemu yanvarın 1-də evdə yuxuda olarkən ölüb.

Sonxeber.az xarici mediaya istinadən xəbər verir ki, rəsmi sənədlərdə doğum tarixi 18 iyun 1902-ci il kimi qeyd olunan Lin bu tarix doğrudursa 122 il 197 gün yaşayıb.

Yeddi uşaq anası olan Lin doğulanda Çini Qing sülaləsi idarə edirdi. Teodor Ruzvelt ABŞ prezidenti, Lord Solsberi isə Böyük Britaniyanın baş naziri idi. Titanik batanda onun 10 yaşı var idi.

Yaşlılıq səbəbiylə görmə itkisi və yıxılaraq ayaqlarından aldığı xəsarətlərdən başqa heç bir ciddi xəstəliyi olmayan Lin həyatı boyu öz işinin öhdəsindən gələ bilib. Ailəsi onun iti eşitmə qabiliyyətini və yaxşı iştahını qoruyub saxladığını qeyd edib.

Onun 77 yaşlı kiçik oğlu anasının həmişə şən və dinc olduğunu, heç kimlə mübahisə etmədiyini deyib. Lin uzun ömür sürməsinin sirrini "yemək, içmək və yatmaq" ilə izah edib.

Linin yaşı Ginnesin Rekordlar Kitabı tərəfindən təsdiqlənməyib. Dünyanın ən yaşlı insanı hazırda 116 yaşlı braziliyalı rahibə İnah Canabarro Lukasdır. Rəsmi olaraq təsdiqlənən ən uzun ömürlü şəxs 122 il 164 gün yaşayan fransız Jeanne Calmentdir.

Telegramda izləyin