"Gələcəkdə Azərbaycanın tərəqqisində və inkişafında gənclərin rolu çox böyük olacaq" - DEPUTATLA MÜSAHİBƏ

Deputat Mahir Süleymanlı Sonxeber.az - ın suallarını cavablandırıb.

Prezident İlham Əliyevin 2024-cü il fevralın 7-də tarixində keçirilən prezident seçkilərində inamlı qələbəsindən bir il ötür. Qazanılan nailiyyətlər və hazırkı gerçəkliklər ölkəmiz üçün hansı perspektivləri vəd edir?

"İlham Əliyevin son 22 ildə ölkəmizə rəhbərlik etdiyi dövrdə Azərbaycan istər iqtisadi, istər siyasi, istər sosial, mədəni, gənclər və idman sahəsində çox böyük nailiyyətlər əldə edib. Bunların hər biri İlham Əliyevin apardığı uğurlu daxili və xarici siyasətin nəticəsidir. Prezidentimiz uzun illərdir dünyanın hegemon dövlətləri ilə yüksək səviyyəli əlaqələr qurur. Qardaş Türkiyə, Rusiya, Avropa ölkələri ilə əlaqələr qurulub. Bu əlaqələr günü-gündən inkişaf edir və artmaqda da davam edir. Bildiyiniz kimi prezidentimiz həm gənclər və idman sahəsinə, həm də mədəniyyət sahəsinə çox böyük diqqət yetirir. Gənclərimizin sosial, iqtisadi və digər sahələrdə irəliləməsinə dövlətimiz çox böyük şərait yaradır. Bunların hər biri İlham Əliyevin həm də Milli Olimpiya Komitəsinin prezidenti olması ilə bağlıdır. Onun apardığı uğurlu islahatlar bu gün Azərbaycanı istər Cənubi Qafqazın, istərsə də dünyanın tanınan hegemon dövlətlərindən birinə çevirib. Bunun nəticəsidir ki, İlham Əliyev bir il öncə - 2024-cü ilin fevralında keçirilən prezident seçkilərində də xalqın etimadını qazanaraq növbəti dəfə Azərbaycan Respublikasının prezidenti seçildi. Bu, xalqımızın prezidentimizə verdiyi dəyərin bariz nümunəsidir. Həmçinin, İlham Əliyevin Qarabağın alınmasında ordumuza çox güclü komandanlıq etməsinin də böyük rolu var. Onun rəhbərliyi ilə biz torpaqlarımızı işğaldan azad etdik. Çox böyük hərbi və siyasi qələbə qazandıq. Azərbaycanı artıq bütün dünya tanıyır. Bunların hər biri İlham Əliyevin apardığı uğurlu siyasətin nəticəsidir. Təbii ki, əsgərlərimizin, ordumuzun, qazilərimizin, şəhidlərimizin qanı-canı bahasına bu qələbə qazanılıb. Burda xalq, ordu, prezident birliyi çox böyük rol oynayıb".

Mahir bəy, hazırda ölkəmizin qarşısında duran əsas vəzifələrdən biri işğaldan azad olunan ərazilərə Böyük Qayıdışı təmin etməkdən ibarətdir. Bu gün qayıdış, bərpa-quruculuq işləri üçün ən böyük maneə Ermənistanın basdırdığı minalardır. Təəssüf ki, Ermənistanın ölkəmizə qarşı apardığı mina terroru davam edir.

"Torpaqlarımız işğaldan azad edildikdən sonra ərazilərimizə böyük köç başlayıb. Təbii ki, minalardan təmizlənmə mühim əhəmiyyət kəsb edən bir məsələdir. Buna görə prezidentimizin sərəncamı ilə Azərbaycan Respublikasında Minatəmizləmə Agentliyi yaradılıb. Həmin agentlik bu sahədə işlərin görülməsində çox mühim rol oynayır. Ermənistanın mənfur siyasəti nəticəsində son 30 ildən artıq müddətdə bizim işğal altında olan torpaqlarımızda böyük dağıntılar həyata keçirilib. Məscidlərimiz dağıdılıb, mədəni abidələrimiz məhv edilib. Ərazilərimizdə salamat heç bir bina, ev qalmayıb. Bunlar Ermənistanın vəhşi siyasətinin nəticəsidir. O ərazilərdə basdırılan minalar da Ermənilərin soyqırımsevər millət olduğunun, insanlığa qarşı necə mənfur davrandığının əyani sübutudur. Bildiyiniz kimi artıq bu sahədə işlər aparılır. Minatəmizləmə üçün böyük avadanlıqlar alınıb. Onlar işğaldan azad olunan ərazilərimizdə fəaliyyətə başlayıb. Ümid edirik ki, yaxın zamanda işğaldan azad olunan ərazilərimiz minalardan tam təmizlənəcək. Vətəndaşlarımız həmin torpaqlarımızda əmin amanlıqla yaşayacaq".

44 günlük Vətən müharibəsindən sonra ölkəmizə qarşı başladılan qarayaxma kampaniyası COP29 ərəfəsində daha çox artdı. Ölkəmizə qarşı başladılan təxribatların başında Fransa durur. Hazırda regionda növbəti müharibə qığılcımlarını yaratmaq üçün Ermənistanı silahlandırmağa davam edir. Fransanın regionda vəziyyəti gərginləşdirməyə yönəlmiş addımları davam edərsə Azərbaycan-Fransa arasında diplomatik əlaqələrə son qoyula bilərmi?

"Bildiyiniz kimi, böyük qələbədən sonra Fransa və bəzi Avropa ölkələri Azərbaycana qarşı məlum kompaniyaya start verib. Fransanın Azərbaycana qarşı olan mənfi münasibətinin kökündə onların ermənispərəst mövqeyi dayanır. Çünki, Makron höküməti Azərbaycana qarşı 44 günlük müharibədən sonra çox mənfi bir yol gedir. Ümid edirik ki, gələcəkdə bu problemlərin həlli üçün əməli addımlar atılacaq. Çünki, prezidentimizin də dediyi kimi Azərbaycan çox müstəqil və məqsədyönlü siyasət yürüdür. Heç bir ölkə ilə münasibətlərinin korlanmasını istəmir. Hər zaman istər qonşuları ilə, istərsə də digər Avropa ölkələri ilə uğurlu xarici siyasət keçirməkdə qərarlıdır. Sadəcə Fransa kimi ermənipərəst mövqedə dayanan ölkələr müharibədən sonra Ermənistanın tərəfində duraraq Azərbaycana qarşı heç düzgün olmayan bir mövqe sərgiləyirlər. Bunların da kökündə paxıllıq dayanır. Çünki Azərbaycan kiçik və gənc bir ölkə olmasına baxmayaraq çox böyük qələbə qazanıb. Öz gücünə bütün torpaqlarını işğaldan azad edib. Öz suverenliyini tam şəkildə bərpa edib. Təbii ki, bu, bir çox böyük Avropa ölkələrinin xoşuna gəlmir. Biz ümid edirik ki, Fransa gələcəkdə öz mövqeyini dəyişəcək və Azərbaycanla uğurlu əlaqələri genişləndirəcək. İki ölkə arasında diplomatik əlaqələrin davam edib, etməyəcəyinə gəldikdə isə bu gələcəkdə Fransanın aparacağı siyasətdən asılı olan bir məsələdir".

Bu gün qarşıya qoyulan hədəflərdən biri də qərbi azərbaycanlıların öz doğma yurdlarına köçürülməsidir. Qərbi azərbaycanlıların sülh və təhlükəsiz və ləqayətli şəkildə geri qayıdışı dedikdə nələr nəzərdə tutulur?

"Bildiyiniz kimi, bu gün artıq Qərbi Azərbaycan icması ilə bağlı fəaliyyət göstərən təşkilatlar bir çətir altında fəaliyyətə başlayıb. Təbii ki, gələcəkdə Qərbi Azərbaycana qayıdış proqramı öz həllini tapacaq. Qərbi Azərbaycanadan olan soydaşlarımızın təhlükəsiz və sülh şəraitində öz dədə-baba torpaqlarına qayıtması bizim hər birimizin istəyidir. Əminik ki, gələcəkdə digər məsələlər öz həllini tapdıqdan sonra Qərbi Azərbaycandan olan həmyerlilərimizin öz torpaqlarına qayıdışı təmin ediləcək. Çünki, artıq bizim torpaqlarımız işğaldan azad olunub. Böyük bir qələbə qazanmışıq. Əminik ki, prezidentimizin rəhbərliyi ilə bu məsələ də öz həllini müsbət mənada tapacaq".

Son olaraq, Azərbaycan gəncləri barədə nə düşünürsünüz? Sizcə gələcəyimiz əmin əllərdədirmi?

"Hər il 2 Fevral Azərbaycanda gənclər günü kimi qeyd olunur. Gənclər günü ilk dəfə 2 fevral 1997-ci ildə Heydər Əliyevin sərəncamı ilə elan olunub. Azərbaycan gəncləri ölkəmizin siyasi, idman, mədəniyyət və.s həyatında çox fəal iştirak edirlər, ciddi işlər görürlər. Bu gün İlham Əliyevin gənclərimizə çox böyük qayğısı var. Onlar bu qayğını hiss edirlər. Gələcəkdə də Azərbaycanın tərəqqisində, inkişafında gənclərin rolu çox böyük olacaq".

Çiçək Sadatova

Telegramda izləyin