Polşa quşların mühafizəsini zəiflətmək istəyir - SƏBƏB İSƏ...

Polşa Müdafiə Nazirliyi hesab edir ki, quşların həddən artıq sərt qorunması ölkənin təhlükəsizliyinə təhdid yarada bilər.

Sonxeber.az xəbər verir ki, bu barədə "Dziennik" nəşri nazirliyin rəsmi bəyanatına istinadən məlumat yayıb.

"Müəyyən quş növlərinin yuvalarının dağıdılmasına icazə verilməməsi ilə bağlı uzunmüddətli prosedurlar bir çox investisiyaların, o cümlədən müdafiə layihələrinin ləngiməsinə səbəb ola bilər. Müasir geosiyasi vəziyyətdə bu, yolverilməzdir", deyə Müdafiə Nazirliyindən bildirilib.

Jurnalistlərin məlumatına görə, Polşanın Rusiya və Belarusla sərhədini möhkəmləndirmək məqsədilə hərbçilər meşələri qırır və bu da nadir quş növlərinin yaşayış mühitini məhv edir. Ekologiya fəalları buna cavab olaraq, mühafizə olunan quş növlərinin siyahısını genişləndirməyi təklif edib və bu təşəbbüs İqlim və Ətraf Mühit Nazirliyi tərəfindən dəstəklənib.

10 iyun tarixində Polşa Nazirlər Şurası "Tarcza Wschod" (Şərq qalxanı) proqramını təsdiqləyib. Layihə Rusiya və Belarusla sərhəddə istehkamlar, sədlər, bunkerlər və müşahidə sistemlərindən ibarət müdafiə şəbəkəsinin yaradılmasını nəzərdə tutur. "Şərq qalxanı"nın ümumi dəyəri 10 milyard zlotı (hazırkı məzənnə ilə 2,5 milyard dollardan çox) olaraq qiymətləndirilir və tikinti işlərinin 2028-ci ildə tamamlanması planlaşdırılır.(qaynarinfo)

Telegramda izləyin