"İstəyirdim heç kim ağlamasın, hamı gülsün"

"22.02.1987-ci ildə, elə bu cür qarlı, şaxtalı bir gündə dünyaya göz açmışam. Ağlım kəsəndə ölkəmizdə vəziyyət yaxşı deyildi. Müharibə, qaçqın və köçkün qohumlar, uzun-uzadı çörək növbələri balaca uşağı çox qorxudurdu".

Sonxeber.az olay.az-a istinadən xəbər verir ki, bu sözləri sosial media hesabında aktyor Elcan Rəsulov yazıb.

38 yaşı tamam olan Elcan bunları qeyd edib:

"O qədər gizlində ağlayan adamlar görmüşdüm ki, elə balaca vaxtından hamını güldürməyə çalışırdım. İstəyirdim heç kim ağlamasın, hamı gülsün. Onda mən də xoşbəxt olurdum. Sonra bir az da böyüdüm, artıq yavaş-yavaş hər şey düzəlməyə başlayırdı. İbtidai siniflərdə polis olmaq istəyirdim. Evdən də hüquq fakültəsinə daxil olmağımı hədəfləmişdilər. Ta ki 6-cı sinifdə oxuyanda "Xalq teatrı"na üzv seçilənə qədər. Seçilmək üçün xüsusi səhnəcik və parodiyalar hazırlamışdım. Beləcə bu yolum başladı. Arzularınızın və sevdiyiniz işin arxasınca həmişə gedin. Yəqin ki, uğur yalnız o yoldadır ki, sizin beyninizdən çıxmır.

Pis-yaxşı bu günə qədər gəlmişəm. Azad, xoşbəxt ölkənin vətəndaşıyam. Dünyanın bəlkə də yarısını gəzmişəm. Vətənimdə çox xoşbəxt oluram. Az-çox məni sevən xətrimi istəyən, sənətimi bəyənən adamlar var. Hamısının qarşısında baş əyirəm. Həmişə sıxılmaqdan boğulanda, məhz onları düşünəndə elə bil yeni nəfəs açılır. Yenidən doğulsaydım bu sənətimi seçərdim? Hə. Amma bəzi səhvlər etmişəm ki, etməzdim. Məsələn: Siqareti başlayan gün tərgidərdim. İçki heç bir dəfə də içməzdim. Haradasa 25 yaşına qədər evlənərdim. Magistratura oxuyub, hətta ikinci təhsili alardım. Paralel bir teatrda da işləyərdim. 87 kiloqram çəkimi həmişə saxlayardım. Atamı ölməyə qoymazdım. Heç olmasa 1-2 il artıq yaşaması üçün vuruşardım. Və daha nələr, nələr.... Öpürəm, sizi sevirəm. 38 yaşım uğurlu və köklü dəyişikliklər etmək üçün gəl".

Telegramda izləyin