Ramazanda oruc tutmağın mənəvi üstünlükləri

"Oruc yalnız fiziki aclıq deyil, həm də dərin mənəvi bir prosesdir. Ramazan ayı insanın nəfsini tərbiyə etməsi, iradəsini gücləndirməsi və mənəvi yüksəlişi üçün bir fürsətdir".

Bu sözləri BAKU.WS-ə açıqlamasında ilahiyyatçı Fərid Abdullah bildirib.

Onun sözlərinə görə, sadəcə yemək və içməkdən çəkinmək kifayət etmir; insan sonrakı mərhələdə bədən üzvlərini, hətta fikirlərini, sözlərini və əməllərini də saflaşdırmalıdır:

"Oruc, insanı nəfsani istəklərdən uzaqlaşdıraraq səbir, şükür və təqva yolunda yetişdirir. Həm də, bu ay ibadət baharı, təlim və tərbiyə ayı, təmizlik və paklıq ayı, təqva və özünüislah ayıdır; elə bir aydır ki, Allah-Taalaya yaxınlıq mərhələlərini və Allaha doğru mənəvi səyahəti sürətli və möhkəm addımlarla qət etmək mümkündür.

Xoşbəxt və səadətli kəslər o kəslərdir ki, bu ayın yüksək dəyərini dərk edib, onun sonsuz bərəkətlərindən faydalanarlar, oruc və ibadətlərin bərəkəti ilə mənəvi və maddi problemlərini həll edərlər".

Telegramda izləyin