"13 yaşlı qızın ailəsi onun evlənməsinə dövlət icazə versin hiyləgərlik edib" - AÇIQLAMA

Ağcabədidə 13 yaşlı qızın 24 yaşlı nişanlısından hamilə qalması ictimai müzakirələrə səbəb olub. Bu vəziyyət bir neçə ciddi hüquqi və sosial məsələnin gündəmə gəlməsinə yol açıb. Məhkəmənin hökmü ilə, cinayətə görə 24 yaşlı şəxs altı il azadlıqdan məhrum edilib, lakin o, şərti cəza çəkməklə sınaq müddətinə azadlığa buraxılıb.

Bəs görəsən bu tip əməlləri törədənlər niyə laiqli cəza almırlar?

Mövzu ilə bağlı sosioloq Lalə Mehralı Sonxeber.az -a açıqlama verib:

"Biz artıq neçənci dəfədir ki, ölkədə azyaşlıların erkən nikaha cəlb edildiyi görürük. Bu hadisə isə erkən nikah belə deyil, uşaq istismarıdır. Bu kimi hadisələri törədənlər pul cəzası ilə hadisədən yaxasını qurtara bilir. Bu, əslində bir az da insanların hiyləgərlikləri ilə bağlı vəziyyətdir. Sözügedən ailə əvvəlcə uşağı özündən 13 yaş böyük adamla nişanlayıb, daha sonra isə uşağın "nişanlısı" ilə intim münasibətinə şərait yaradılıb. Bu şəraiti məhz valideyinlər yaradıblar ki, o qız öz nişanlısından hamilə qalsın. Niyə? Ona görə ki, dövlət vətəndaş nikahına məcburən icazə versin deyə. Qızın yaşı azdır, o rəsmi nikahda yaşaya bilməz. Əgər o, bu halda hamilə qalsa, dövlət onlara vətəndaş nikahında yaşamağa icazə verir. Çünki, bundan əvvəl də belə hadisələr olub. Ailə düşünüb və bu hiyləgərliyə əl atıb. Onlar vəziyyət ortaya çıxanda hakim qarşısında vəziyyəti yumşaltmaq, "Öz nişanlısı ilə olub, bir səhvdir ediblər" deyə bilmək üçün bu addımı atıblar. Belə olan hallarda həbs cəzasının pulla əvəz edilməsi ictimaiyyət tərəfindən qınanılır. Bir vətəndaş belə bir əməldən sadəcə pul ödəyərək yaxa qurtarırsa, bu, başqalarına da eyni əməlləri törətməyə cəsarət verir. Əgər hazırki, vəziyyətə görə valideyinlər və azyaşlını istismar edən şəxs cəzalandırılsa idi, həbs edilsə idi, onda bu hamıya dərs olardı. Odur ki, məncə cəza sistemi ağırlaşdırılmalıdır ki, insanlar boşluqlardan, ədalətsizliklərdən istifadə edə bilməsinlər".

Çiçək Sadatova

Telegramda izləyin