Müəllimi atasının il mərasimində öldürən qardaşı - Ağır cəza aldı

Zaqatala rayonunda bacısı 1980-ci il təvəllüdlü Natavan Əhmədovanı güllələyərək qətlə yetirən qardaşına hökm oxunub.

"Qafqazinfo"nun əldə etdiyi məlumata görə, hadisəni törədən 1989-cu il təvəllüdlü Nurlan Əsgərov Cinayət Məcəlləsinin 120.2.4-cü (Xüsusi amansızlıqla adam öldürmə) maddəsi ilə təqsirli bilinib.

Bildirilib ki, hadisə ötən ilin mayında onların atasının il mərasimində baş verib. Nurlan qəfil silah götürərək bacısını boğaz nahiyəsindən güllələyib. Xəstəxanaya çatdırılan qadının vəfat etdiyi məlum olub.

Nurlan ibtidai istintaqa ifadəsində bacısını qısqanclıq zəminində öldürdüyünü iddia edib. Lakin Natavanın telefonunun araşdırılması, həmçinin digər ifadə və sübutlar bu iddianı təkzib edib. O da məlum olub ki, Nurlan 2021-ci ildən narkotik istifadəçisidir və bu maddələrin dövriyyəsi ilə bağlı məhkum edilib.

Natavan Əhmədovanın həyat yoldaşı isə qaynı Nurlanın həbsdə olarkən hörmət qazanması və pis rəftar görməməsi üçün qısqanclıqla bağlı yalan ifadə verdiyini deyib.

Şəki Ağır Cinayətlər Məhkəməsinin hökmü ilə Nurlana 17 il 10 ay həbs cəzası verilib.

Xatırladaq ki, N. Əhmədova rayonun Yuxarı Tala kənd 2 nömrəli məktəbində müəllim işləyirmiş.

Telegramda izləyin