İşdən çıxarıldığı gün ona sərvət qazandırdı – 70 min manat təzminat aldı

İngiltərədə fəaliyyət göstərən "Dermalogica UK" şirkətində yarımştat çalışan Joanne Neill məzuniyyətdə olduğu gün "ümumi vəziyyəti müzakirə etmək" adı ilə onlayn görüşə dəvət olunub.

Sonxeber.az xarici mediaya istinadən xəbər verir ki, amma görüş zamanı ona işdən çıxarıldığı bildirilib. Neill bu qərara etiraz edərək məhkəməyə müraciət edib və qalib gəlib.

Məhkəmə işinə baxan hakim Liz Ord şirkətin bu addımını həm vaxt, həm də üsul baxımından səhv hesab edib. Onun sözlərinə görə, görüşün başlığı sadə və rəsmi olmayan bir təəssürat yaradıb və bu da Neillin hazırlıqsız yaxalanmasına səbəb olub. Üstəlik, görüş onlayn keçirildiyi üçün o, nə iş yoldaşından, nə də insan resursları nümayəndəsindən dəstək ala bilməyib.

Hakim həmçinin qərarda dolayı cinsiyyət ayrı-seçkiliyinə də diqqət çəkib. Qadınların kişilərə nisbətən daha çox yarımştat işlədiyini bildirən hakim qeyd edib ki, bu cür işçilərin hədəf alınması qadınlara daha çox zərər vurur. Məhkəmə, Neillin yalnız iş saatlarına görə işdən çıxarıldığını və bunun gender ayrı-seçkiliyi sayıldığını bildirib.

Məhkəmə qərarına əsasən, "Dermalogica UK" şirkəti Joanne Neill-ə təxminən 70 000 manat təzminat ödəməlidir. Bu qərar, işəgötürənlərin yarımştat və məsafədən işləyən əməkdaşlarla bağlı siyasətlərini daha diqqətlə nəzərdən keçirməsinin vacibliyini göstərdi.

Telegramda izləyin