Pentaqon gender və irqi kvotalardan İMTİNA ETDİ

ABŞ Müdafiə Nazirliyi nüfuzlu hərbi xidmət müəssisələrinə namizədlərin seçilməsi ilə bağlı yanaşmasını kökündən dəyişir.

Oxu.Az-ın Rusiya KİV-ə istinadən xəbərinə görə, bu barədə Pentaqon rəhbəri, ABŞ müdafiə naziri Pit Heqset öz "X" hesabında paylaşım edib.

Məlumata görə, Pit Heqsetin imzaladığı yeni memoranduma əsasən, bundan sonra abituriyentlərin qəbulu zamanı irqi mənsubiyyət, etnik mənşə və gender identifikliyi nəzərə alınmayacaq.

"Bütün gələcək qəbullar yalnız layiqincə həyata keçiriləcək. İrq, etnik mənsubiyyəti və ya cinsi mənsubiyyət artıq nəzərdən keçirilməyəcək. Zabitlərimiz yaxşıların yaxşısı olacaq ", - deyə o bildirib və rəsmi sənədinin fotoşəkilini dərc edib.

Memoranduma əsasən, hərbi akademiyaların rəhbərliyinə namizədlərin qiymətləndirilməsi meyarlarını tam nəzərdən keçirmək və 2026-cı tədris ili üçün seçimin başlanmasına hazırlaşmaq məqsədilə 30 gün vaxt verilir.

Yeni sistem üç əsas faktora əsaslanacaq: Abituriyentlərin idman nailiyyətləri, əvvəlki hərbi xidmət təcrübəsi və hazırlıq məktəblərində əldə etdikləri akademik nailiyyətlər.

Bildirilib ki, bu qərar orduda müxtəlifliyi, bərabərliyi və inklüzivliyi fəal şəkildə təşviq edən əvvəlki administrasiyanın siyasətindən əhəmiyyətli dərəcədə uzaqlaşmanı göstərir.

Telegramda izləyin