Özəl hazırlıq kurslarından birində dəhşət: Naməlum şəxs şagirdi bıçaq və çubuqla vurdu - VİDEO

Kocaelinin Gebze rayonunun Mustafapaşa məhəlləsində yerləşən "Gebze Duru Özəl Təhsil Kursu" binasında qorxulu anlar yaşanıb.

Sonxeber.az türk mediasına istinadən xəbər verir ki, iddialara görə, tənəffüs zamanı binanın qarşısında dayanan və kimliyi hələlik müəyyənləşməyən bir şəxs ilə kursun bəzi şagirdləri arasında sözlü mübahisə baş verib. Şagirdlər daha sonra sinfə geri dönüblər.

Qısa müddət sonra əlində bıçaq və çubuqla sinfə daxil olan şəxs, 12-ci sinif şagirdi T.A.K.-yə qəfil hücum edib. Hadisə kursun təhlükəsizlik kameraları tərəfindən saniyə-saniyə qeydə alınıb. Kadrlarda şəxsin sinfə daxil olaraq birbaşa T.A.K.-yə yaxınlaşdığı və ardıcıl zərbələr endirdiyi görünür. Yaralı şagird çətinliklə də olsa hücumdan xilas ola bilib. Hadisə zamanı sinfə daxil olan kurs sahibi müdaxilə edərək hücumçunu sakitləşdirib və onu binadan çıxarıb. Daha sonra həmin şəxs ərazidən uzaqlaşıb.

Yaralı şagird xəstəxanaya öz imkanları ilə müraciət edib. Polis tərəfindən saxlanılan şəxs dindirildikdən sonra sərbəst buraxılıb.

Hadisədən sonra kurs rəhbərliyinin sosial mediada "özəl mühafizəçi" axtarışı ilə bağlı elan paylaşdığı da müəyyən olunub.

Telegramda izləyin