Geyim mağazasına silahlı hücum – 5 nəfər yaralanıb

İstanbulun Bağcılar rayonunda naməlum şəxs geyim mağazasına silahlı hücum edib. Hadisə nəticəsində mağazada olan 5 nəfər yaralanıb. Hücum edən şəxs isə hadisə yerindən yayınıb.

Sonxeber.az türk mediasına istinadən xəbər verir ki, hadisə Bağcılar ərazisində yerləşən geyim mağazasının qarşısında baş verib. Kimliyi hələ müəyyənləşdirilməmiş şəxs mağazanın önünə gələrək əlindəki silahla atəş açmağa başlayıb. Açılan atəş nəticəsində mağazada olan 4 müştəri və 1 mağaza işçisi güllə yarası alıb.

Hadisədən sonra şübhəli şəxs piyada qaçaraq izini itirib. Yaralanan şəxslər qan içində yerə yıxılaraq ətrafdakı insanlardan kömək istəyiblər. Hadisə yerinə dərhal çox sayda polis və təcili tibbi yardım nümayəndələri cəlb olunub.

Yaralılara ilkin tibbi yardım göstərildikdən sonra onlar yaxınlıqdakı xəstəxanalara yerləşdirilərək müalicəyə götürülüblər. Verilən məlumata görə, yaralıların həyatına təhlükə yoxdur.

Polis hadisə yerində araşdırmalara başlayıb. Hücum edən şəxsin kimliyinin müəyyənləşdirilməsi və saxlanılması üçün genişmiqyaslı əməliyyat başladılıb.

Telegramda izləyin