Napoleonun mühüm missiyalar üçün istifadə etdiyi əfsanəvi qılıncı satışa çıxarıldı

Napoleon Bonapartın 10 il ərzində daşıdığı əfsanəvi qılınc Parisdə 850 min funt sterlinqə (təxminən 1.9 milyon manat) satışa çıxarılıb.

Oxu.Az xəbər verir ki, bu barədə Daily Mail məlumat yayıb.

Bu silah 1804-cü ildə Napoleonun Fransa imperatoru elan olunması şərəfinə Versal silah zavodunda hazırlanıb. 81 sm-lik qılıncın üzərində "N Bonaparte" və "Premier Consul" (Birinci Konsul) yazıları həkk olunub. Napoleon bu qılıncı çox qiymətləndirirdi və 1815-ci ilin martına qədər özündə saxlayıb.

Sonradan o, bu qılıncı Lionun ələ keçirilməsi və Anqulem hersoqunun əsir alınması münasibətilə marşal Emmanuel de Qruşiyə hədiyyə edib. Vaterloo döyüşündəki məğlubiyyətdən sonra Napoleon Müqəddəs Yelena adasına sürgün edilib və ömrünün son illərini orada keçirib. Qılınc isə 210 il ərzində Qruşi ailəsində saxlanılıb və indi "Druo" hərracında satışa çıxarılıb.

Hərracın təşkilatçısı bildirib ki, bu silah nadirliyi, yüksək keyfiyyəti və unikal tarixi ilə fərqlənir. Bu qılınc Napoleonun iki əsrdən artıq bir ailədə qorunub saxlanılmış azsaylı şəxsi əşyalarından biridir.

Telegramda izləyin