Qurbağa əti yemək günahdır? – İlahiyyatçıdan AÇIQLAMA

Son günlər sosial şəbəkələrdə qurbağa ətinin halal və ya haram olması ilə bağlı geniş müzakirələr gedir. Bəziləri bunun dinən qadağan olduğunu iddia edir, digərləri isə mədəni və zövq məsələsi olduğunu bildirir.

Bəs İslam bu məsələ barədə nə deyir?

Mövzu ilə bağlı Ölkə.az-a danışan ilahiyyatçı Fərid Abdullah bildirib ki, son zamanlar sosial şəbəkələrdə qəribə heyvanlar, həşəratlar və müxtəlif tanınmamış meyvə-bitkilərin yeyilməsi ilə bağlı videoların sayı artmaqdadır:

"Bu görüntülər bir çox izləyicidə maraq doğurur: "Görəsən dadı necədir? Mən də sınayım" kimi fikirlər formalaşır. Bu marağı fürsət bilən bəzi biznes sahibləri də bu istiqamətdə fəaliyyətlərini genişləndirməyə başlayırlar.

Əslində, bu cür hallar başdan-ayağa qadağan sayılmır. Amma məsələni iki yönlü qiymətləndirmək lazımdır: bir tərəfdə həyatını İslam dəyərləri və dini prinsiplərlə uyğun şəkildə tənzimləyən insanlar var, digər tərəfdə isə bu kimi məsələləri önəmli hesab etməyənlər. Dini həssaslığa malik insanlar üçün nə yeyib-içdikləri və onun dini hökmlərə uyğun olub-olmaması ciddi əhəmiyyət daşıyır. Digərləri isə əsasən bu mövzuya neytral yanaşır".

İlahiyyatçı qeyd edib ki, bu kontekstdə gündəmə gələn məsələlərdən biri də qurbağa ətinin satışa çıxarılmasıdır:

"Açığı, bunun geniş şəkildə rəğbət qazanacağını düşünmürəm. Çünki qurbağa əti gündəlik istehlak edilən ət növləri – mal, qoyun və ya balıq əti kimi insanların mətbəxində yer alan bir qida deyil. Həm də bu yazının məqsədi qurbağa ətinin nə qədər populyar olub-olmaması deyil. Sual budur: Müsəlman bir şəxs qurbağa əti yeyə bilərmi?

Bu sual inanc məsələsindən çox fiqhi (hüquqi) xarakter daşıyır. Yəni İslam hüququnun detallarını əhatə edən mövzulardandır və bu səbəblə hədis kitablarında da bu barədə qeydlər mövcuddur. Fiqh alimləri qurbağa ətini halal qida sırasına daxil etməyiblər. Qurbağa özü murdar və ya nəcis sayılmasa da, onun öldürülməsi məkruh, yəni bəyənilməyən bir əməl kimi göstərilmişdir və yeyilməsi haram hesab olunur.

Qurani-Kərimdə Əbəsə surəsinin 24-cü ayəsində insanın yediyi qidaya diqqət yetirməsi tövsiyə olunur. Bu da göstərir ki, İslam mədəniyyətində qidalanma təkcə fiziki ehtiyacın ödənməsi deyil, mənəvi və ruhi baxımdan da önəmli təsirə malikdir. Odur ki, hər fərqli və qeyri-adi dada can atmazdan əvvəl insan "nə yeyirəm" sualını özünə verməlidir. Çünki yemək təkcə qarın doyuzdurmaq deyil".

Telegramda izləyin