Əyləncə məkanına əl bombası ilə hücum – 7 nəfər yaralandı

İstanbulun Kağıthane rayonunda naməlum şəxslər tərəfindən bir əyləncə məkanına əl bombası ilə hücum təşkil olunub.

Sonxeber.az türk mediasına istinadən xəbər verir ki, baş verən partlayış nəticəsində 3-ü ağır olmaqla, ümumilikdə 7 nəfər yaralanıb.

Əldə edilən məlumata görə, 5 mərtəbəli binanın əyləncə məkanı kimi istifadə olunan ikinci mərtəbəsinə motosikletlə gələn iki nəfər tərəfindən əl bombası atılıb.

Hadisə ilə bağlı məlumat daxil olduqdan sonra əraziyə təcili tibbi yardım, polis, bomba mütəxəssisləri, olay yeri araşdırma, xüsusi təyinatlı dəstələr, terrorla mübarizə və xilasetmə qrupları cəlb olunub.

Ərazidə təhlükəsizlik tədbirləri görülüb, partlayış yerində xüsusi təlim keçmiş itlərlə və mütəxəssislərlə araşdırma aparılıb. Hücumda iştirak edən şəxslərin müəyyənləşdirilməsi və saxlanılması məqsədilə yaxınlıqdakı təhlükəsizlik kameralarının görüntüləri də incələnir.

Yaralanan 7 nəfər – 3-ü ağır vəziyyətdə olmaqla – təcili tibbi yardımla ətrafdakı xəstəxanalara çatdırılıb. Hücumla bağlı istintaq davam edir və şübhəlilərin tutulması üçün genişmiqyaslı axtarış aparılır.

Telegramda izləyin