Kosmetika seçərkən nələrə diqqət edilməlidir? - MƏSLƏHƏTLƏR

Kosmetik məhsul seçərkən ilk növbədə tərkibinə diqqət yetirilməlidir. Ən optimal seçim mümkün qədər az komponentdən ibarət olan, təbii tərkibli kosmetikadır.

Oxu.Az xəbər verir ki, bu barədə rusiyalı allerqoloq-immunoloq Nataliya Popova news.ru-ya danışıb.

Mütəxəssisin sözlərinə görə, düzgün seçilmiş dəriyə qulluq məhsulları uzunmüddətli sağlamlıq və gözəlliyin təminatıdır:

"Doğru kosmetika seçimi sizin sağlamlıq və gözəlliyinizi uzun illər qorumağa kömək edir. Bunun üçün məhsulun etiketini diqqətlə oxuyun. Tərkibində mümkün qədər az komponent olan kosmetikaya üstünlük verin. "Organic", "Natural" və ya "Cruelty-Free" kimi nişanlar olan məhsullar daha təhlükəsiz hesab olunur, çünki onların tərkibində zərərli maddələr minimum səviyyədədir", - deyə Popova vurğulayıb.

İmmunoloq, həmçinin istehsalçının etibarlılığına və istifadəçi rəylərinə xüsusi diqqət yetirməyi tövsiyə edib. O, hətta hipoallergen kimi təqdim edilən məhsulların da əvvəlcədən test edilməsinin vacibliyini qeyd edib:

"Kosmetik məhsul seçərkən keyfiyyətli brendləri tanımağı öyrənin. İstehsalçının tarixçəsini, nüfuzunu araşdırın və real istifadəçi rəyləri ilə tanış olun. Hətta hipoallergen məhsullarda da dərinizin reaksiyasını öncədən yoxlayın. Bunun üçün məhsulu əvvəlcə biləyin iç tərəfində test edin".

Telegramda izləyin