ABŞ-də bir qrup turist "qar adamını" lentə alıb

ABŞ-də "qar adamı" lentə alınıb.

Oxu.Az xəbər verir ki, bu barədə "Daily Mail" məlumat verib.

Kolorado ştatında bir qrup turist internetdə qızğın müzakirələrə səbəb olan videogörüntü qeydə alıblar. Səyahətçilər tərəfindən lentə alınan kadrlarda böyük tüklü məxluqun sıx meşədə gəzdiyi görünür.

Ekspedisiyanın aparıcı bələdçisi Loqan Kirk bildirib ki, o və təxminən 12 digər iştirakçı nahar etmək üçün dayanıblar və bu zaman turistlərdən biri uzaqda - təxminən 500 metr aralıda kiminsə hərəkət etdiyini hiss edib.

"Kimsə ayı gördüyünü dedi, amma diqqətlə baxanda bunun ayı olmadığını başa düşdük. Bu, ikiayaqlı bir canlı idi. Yamacda dayanmışdı", - Kirk xatırlayır.

Videoda bədəni tünd rəngdə tüklə örtülü olan fiqurun şamların arasından keçdiyi və sanki kameranı görüb, ağacların arasında dayandığı, sonra kolluqda gözdən itdiyi əks olunub. Lakin skeptiklər bu görüntülərdə əyninə kostyum geyinmiş adamın və ya arxa ayaqları üstə dayanan və bir müddət iki ayaq üstə gəzən ayının görünə biləcəyini ehtimal edirlər.

"Niyə "qar adamı" həmişə bulanıq və uzaqdan çəkilir?" - deyə şərhçilər yazıblar.

Şübhələrə baxmayaraq, Loqan və komandası əlavə sübutlar tapmaq üçün eyni yerə qayıtmaq niyyətindədirlər.

Kirkin sözlərinə görə, o, kadrları ətraflı öyrənib və təsviri böyüdüb, lakin hələlik dəqiq nəticə çıxara bilməyib.

Telegramda izləyin