Azərbaycan dilində şeir oxuyan Pezeşkian Ermənistanda nə deyəcək?

İran Prezidenti Məsud Pezeşkianın yaxın günlərdə Ermənistana rəsmi səfəri planlaşdırılır.

Milli.Az xəbər verir ki, bu barədə Ermənistanın xarici işlər naziri Ararat Mirzoyan məlumat verib.

Mövzunu şərh edən politoloq Elxan Şahinoğlunun sözlərinə görə, Pezeşkian prezident seçildikdən sonra ilk xarici səfərini Cənubi Qafqaz ölkələri arasında Azərbaycana edib:

"Onun bu seçimi milli kimliyi və Azərbaycanın türk dili ilə bağlılığı baxımından təbii qarşılanıb.

Bununla belə, müşahidəçilər bildirirlər ki, Pezeşkian İrəvanda Bakıda verdiyi bəyanatların eynisini səsləndirə bilməyəcək. Məsələn, Azərbaycan dilində "Heydərbabaya Salam" şeirini səsləndirməsi kimi jestlərin İrəvanda təkrarlanması mümkün görünmür.

İrəvanda İran Prezidentinin daha çox mehriban qonşuluq və iqtisadi əməkdaşlığın inkişafı kimi neytral mövzulardan danışacağı gözlənilir. Onun Ermənistanda verəcəyi bəyanatlar yalnız Bakıda deyil, həm də Təbriz və Ərdəbil kimi şəhərlərdə də diqqətlə izlənəcək".

Telegramda izləyin