Marsda mikrob var? - TƏDQİQAT

NASA-nın Perseverance aparatı Marsın geoloji keçmişinə nüfuz edə bilib.

Lent.az xarici KİV-ə istinadən xəbər verir ki, bunun üçün o, qəribə bir dağ süxurunu araşdırıb. Alimlərin fikrincə, bu süxur özündə Marsda həyatın olub-olmaması barədə məlumat daşıya bilər. Perseverance öz alətindən istifadə edərək qayalı Mars süxurunun üst qatını təmizləyib və bununla da onun tərkibini və tarixini daha ətraflı analiz etmək üçün yeni bir səthi üzə çıxarıb. Bu prosedur mexaniki üyüdmə və qaz şırnağı ilə təmizləmə kombinasiyasını əhatə edir və alimlərə süxurun iç qatlarını araşdırmağa imkan verir. Bu daxili qatlar milyardlarla il ərzində külək, radiasiya və toz tərəfindən dəyişdirilməmiş şəkildə qalmışdır. Alimlərin sözlərinə görə, Perseverance qəribə bir qayalı süxur aşkar edib və buna görə də ona bu süxuru alətləri vasitəsilə daha ətraflı araşdırmaq tapşırılıb.
Sələfləri ilə müqayisədə Perseverance nümunələri təmizləmək üçün təkmilləşdirilmiş bir toz təmizləmə alətindən istifadə edir. Bu sistem süxurları təmizləmək üçün 5 azot şırnağından istifadə edir. Süxurun üst qatı təmizləndikdən sonra aparat aşkar olunmuş səthi təhlil etmək üçün digər cihazlarını işə salıb. Perseverance-ın WATSON kamerası yaxın plan şəkillər çəkir, SuperCam isə materialın tərkibini təhlil etmək üçün lazer impulslarından və spektrometrdən istifadə edir, eyni zamanda yeni səthdən əks olunmuş görünən və infraqırmızı işığı araşdırır. Araşdırma göstərib ki, bu süxur özündə gil tərkibli minerallar birləşdirir. Bu minerallar suyu hidroksid molekulları formasında saxlayır və dəmir ilə maqneziuma bağlı olur ki, bu da Marsın qədim süxurlarına xas xüsusiyyətdir. Perseverance həmçinin SHERLOC və PIXL alətlərindən istifadə edərək süxurlarda mineral tərkibini, kimyəvi quruluşu və keçmiş su fəaliyyəti və ya mümkün mikrob həyatının əlamətlərini müəyyənləşdirir.
Perseverance aparatı:

Bu alətlər yalnız gil deyil, həm də çöl şpatının mövcudluğunu aşkar etməyə kömək edib. Çöl şpatı Yer qabığında və digər qayalı planetlərdə geniş yayılmış mineraldır. Alimlər həmçinin ilk dəfə olaraq süxur nümunələrində manqan hidroksidini aşkar ediblər. Perseverance bu qəribə süxuru milyardlarla il əvvəl çay deltasının və gölün yerləşdiyi Jezero kraterində tədqiq edib. Alimlərin fikrincə, burada Marsda bir zamanlar mövcud olmuş mikrob həyatının mümkün izləri qorunub saxlanmış ola bilər, çünki həmin dövrdə planetin səthində maye halında su olub. Tədqiqatçılar hesab edirlər ki, bu və Marsdakı digər oxşar süxurların gələcəkdə daha dərindən araşdırılması Qırmızı planetin əsas sirrlərindən birini - Marsın keçmişdə yaşama uyğun bir dünya olub-olmadığını - açmağa kömək edə bilər.

Telegramda izləyin