"Artıq uzun illərdir ki, Rusiya Cənubi Qafqaz regionunda sülh və sabitlik deyil, zülm və etnik ayrı seçkilik yayır" - DEPUTAT

"Son dövrlər Rusiya daxilində baş verən ictimai-siyasi hadisələr, bu ölkədə dövlət səviyyəsində aparılan irqçi və şovinist siyasətin nəinki dərinləşdiyini, hətta ifrat formaya keçdiyini açıq şəkildə göstərir".

Bunu Sonxeber.az-a açıqlamasında Milli Məclisin deputatı Müşfiq Cəfərov danışıb.

O, açıqlamasında qeyd edib ki, Kreml daxili narazılığı boğmaq və totalitar nəzarəti möhkəmləndirmək üçün qeyri-rus xalqları və miqrantları hədəf seçərək onları günahkar rolunda təqdim edir:

"Rusiya beynəlxalq arenada özünü multikultural dəyərləri müdafiə edən çoxmillətli dövlət kimi təqdim etsə də, daxildəki bu cür addımlar həmin imicin sadəcə üzdə olduğunu göstərdi. Etimad və tərəfdaşlıq yalnız yüksəksəviyyəli bəyanatlarla deyil, sıravi vətəndaşlara göstərilən münasibətlə də formalaşır. Belə yanaşmalar isə nə strateji tərəfdaşlığa, nə də regionda sabitliyə xidmət edir. Moskva anlamalıdır ki, etnik hədəfləməyə əsaslanan davranışlar ictimai sabitliyi möhkəmləndirmir. Əksinə, bu, həm sosial parçalanmaya, həm də beynəlxalq münasibətlərdə gərginliyin artmasına səbəb olur.
Rusiya hüquq-mühafizə orqanlarının vəhşiliyinə məruz qalan şəxslərin danışdıqları bir daha təsdiqləyir ki, miqrantlara, xüsusilə də azərbaycanlılara qarşı ciddi ayrı-seçkilik və xoşagəlməz münasibət mövcuddur. Rusiya tərəfi bu kimi hallar və proseslərin qarşısını almalı, gələcəkdə belə hadisələrin baş verməməsi üçün qəti tədbirlər görməlidir.
Artıq uzun illərdirki, Rusiya Cənubi Qafqaz regionunda sülh və sabitlik deyil, zülm və etnik ayrı seçkilik yayır. Lakin bütün hallarda Azərbaycan dövləti öz vətəndaşlarının hüquqlarını müdafiə edəcəkdir.Bu sahədə əməli addımlar da atılıb. Rusiya dövlətinə lazimi xəbərdarlıqlar edilib".

Vüsalə İbrahimli

Telegramda izləyin