Tanınmış jurnalist vəfat etdi - FOTO

"Cumhuriyet" qəzetinin tanınmış qələm sahiblərindən olan türkiyəli jurnalist-yazar Hikmət Çetinkaya, uzun müddətdir davam edən səhhət problemləri səbəbilə vəfat edib.

Sonxeber.az xəbər verir ki, çetinkaya çoxsaylı orqan çatışmazlığı diaqnozu ilə müalicə olunduğu xəstəxanada dünyasını dəyişib.

İzmir Jurnalistlər Cəmiyyətinin verdiyi açıqlamada bildirilib ki:

"Uzun illər "Cumhuriyet" qəzetinin Egey bölgəsi üzrə təmsilçiliyini həyata keçirən, cəmiyyətimizin üzvü Hikmət Çetinkaya çoxsaylı orqan çatışmazlığı səbəbilə müalicə olunduğu xəstəxanada vəfat etmişdir. Dəfn mərasimi ilə bağlı məlumatlar daha sonra paylaşılacaq. Həmkarımıza Allahdan rəhmət, yaxınlarına səbir və başsağlığı diləyirik".

Peşəsinə həsr olunmuş bir ömür

1942-ci ildə Balıkəsirin Edremit rayonunda anadan olan Hikmət Çetinkaya orta təhsilini Manisa Kişi Liseyində başa vurub. Jurnalistlik fəaliyyətinə "Cumhuriyet" qəzetində müxbir kimi başlayıb.

1966-1980-ci illər arasında Türkiyənin müxtəlif bölgələrində apardığı müsahibələrlə diqqət çəkən Çetinkaya, peşəkar fəaliyyətində bir sıra mükafatlara layiq görülüb. 1968, 1970 və 1971-ci illərdə İzmir Jurnalistlər Cəmiyyətinin təqdim etdiyi Hasan Tahsin Mükafatını, 1975-ci ildə isə Türk Dil Qurumu tərəfindən Basın Mükafatını qazanıb.

Bir müddət "Cumhuriyet" qəzetinin İzmir nümayəndəsi kimi fəaliyyət göstərən Çetinkaya, 1986-cı ildən etibarən müntəzəm olaraq köşə yazıları yazmağa başlayıb. Qələmi ilə yalnız jurnalistikaya deyil, ədəbiyyat aləminə də töhfələr verən təcrübəli qələm sahibi, bir çox kitabın müəllifi olub.

2014-cü ildə isə Türkiyə Jurnalistlər Cəmiyyəti tərəfindən 50 ildən artıq peşəkar təcrübəsi və xidmətlərinə görə Burhan Felek Mətbuat Xidmət Mükafatı ilə təltif edilib.

Telegramda izləyin