"Diaspor və lobbiçilik fəaliyyəti istənilən ölkənin xarici siyasətində, sözsüz ki, olduqca əhəmiyyətli yer tutur" - DEPUTAT

"Azərbaycan Respublikası müstəqillik əldə etdikdən sonra xarici ölkələrdə yaşayan soydaşlarımızla əlaqələr xeyli genişlənib və diasporla iş dövlət siyasətinə çevrilib. Dünya təcrübəsi də göstərir ki, dövlətçiliyin inkişafında diaspor amili mühüm yerlərdən birini tutur. Ümumiyyətlə, beynəlxalq münasibətlər sistemində diaspor özündə siyasət, mədəniyyət, cəmiyyətlər, birliklər və s. birləşdirən institutlaşmış funksional tərkib kimi qəbul edilir. Diaspor amili dövlətçiliyin inkişafı və ölkənin dünyadakı nüfuzunun, təsir imkanlarının artması baxımından mühüm əhəmiyyətə malikdir. Ayrı-ayrı ölkələrdə fəaliyyət göstərən Azərbaycan diaspor təşkilatlarının fəaliyyətinin yeni mərhələsində müəyyən qüsurlar da mövcud idi".

Bu sözləri Sonxeber.az-a Milli Məclisin deputatı Müşfiq Cəfərov danışıb.

O, açıqlamasında qeyd edib ki, Azərbaycan Respublikasının rəhbərliyi tərəfindən həyata keçirilmiş məqsədyönlü tədbirlər nəticəsində dünya azərbaycanlılarının konsolidasiyasında, diaspordan lobbiyə doğru inkişafında yeni mərhələnin başlanğıcı qoyulub:

"Azərbaycançılıq həm Azərbaycanda, həm də bütün dünyada yaşayan azərbaycanlılar üçün əsas ideyaya çevrilib. Qazanılmış nailiyyətlər ölkə daxilində milli birliyin təmin olunmasına, dünya azərbaycanlıları arasında həmrəyliyin güclənməsinə zəmin yaradıb. Xaricdə yaşayan həmvətənlərimiz bu gün Azərbaycan Respublikasında həyata keçirilən iqtisadi islahatlar prosesinə yaxından cəlb ediliblər. Onların Azərbaycan iqtisadiyyatına investisiya qoyması və ölkə ərazisində sərbəst şəkildə sahibkarlıq fəaliyyəti ilə məşğul olması üçün əlverişli şərait yaradılıb.

Diaspor və lobbiçilik fəaliyyəti istənilən ölkənin xarici siyasətində, sözsüz ki, olduqca əhəmiyyətli yer tutur.
Bu günə qədər Diaspora ilə İş üzrə Dövlət Komitəsi çox böyük işlər görüb. Uzaq məmləkətlərdə yaşayan azərbaycanlıları həmin ölkələrin ictimai, siyasi və mədəni həyatında iştiraka cəlb edir və onları stimullaşdırır. Təbii ki, bu sahədə xeyli müsbət nəticələr əldə edilib.

Bu gün azərbaycanlılar ABŞ-da, Avropa İttifaqı ölkələrində, o cümlədən Rusiyada nə qədər fəal olsalar, həmin dövlətlərin siyasətinə də təsir göstərə bilirlər. Ona görə də diasporlara ayrılan vəsaitlər əsasən təşkilatlanma məsələlərinə yönəldilir və bu, olduqca vacibdir".

Deputat onu da vurğuladı ki, diaspor fəaliyyətində bir sıra irəliləyişlər var, amma bunu yetərli hesab etmək qətiyyən doğru deyil:

"Çünki son illərə qədər Azərbaycan diasporunun yerli cəmiyyətlərə inteqrasiya problemləri olub və bu hələ də davam edir. Digər bir problem isə xaricdə, xüsusilə Avropa və ABŞ-da ikinci nəsil azərbaycanlıların diaspora qazandırılması ilə bağlıdır.

Əgər əvvəllər bizim üçün inteqrasiya məsələsi problem idisə, indi isə ikinci nəsil azərbaycanlıların assimilyasiya problemi var. Azərbaycan diasporu Tovuz döyüşlərindən sonra mütəşəkkil formada fəaliyyət göstərdi və bir sıra ölkələrdə təşkilatlanaraq sistemli addımlar atdı.

Dövlət başçısı İlham Əliyev Şuşa qurultayında diaspor nümayəndələrinə tövsiyələr verdi və bu tövsiyələr əslində bir növ yol xəritəsi idi. Cənab Prezident bildirdi ki, Azərbaycan həqiqətlərinin, erməni vandalizminin dünyaya çatdırılması kifayət qədər vacibdir və mübarizə hələ də davam edir. Biz də bütün azərbaycanlıların bu sahədə ciddi təşkilatlanmalarını gözləyirik".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Diaspor quruculuğu, lobbiçilik və dünya azərbaycanlılarının həmrəyliyi" mövzusuna uyğun olaraq dərc edilir.

Telegramda izləyin