"Mehdi Sobhaninin Xankəndi şəhərində keçirilmiş Zirvə görüşünün yekun sənədi ilə bağlı iddiaları qərəzli və əsassızdır" - DEPUTAT

İranın Ermənistandakı səfiri Mehdi Sobhaninin Ermənistanın "Armenpress" agentliyinə verdiyi müsahibədə İqtisadi Əməkdaşlıq Təşkilatının (İƏT) Xankəndi şəhərində keçirilmiş 17-ci Zirvə görüşünün yekun sənədi ilə bağlı iddiaları qərəzli və əsassızdır. Bu barədə artıq Azərbaycan Xarici İşlər Nazirliyi (XİN) məlumat yayıb.

Belə mötəbər tədbirlərin yekun sənədi adətən tədbirdən çox öncə diplomatik kanallar vasitəsilə tərəf ölkələrlə razılaşdırılır. Xankəndi Kommünikesi də bu şəkildə razılaşdırılıb. Bu, əvvəlki Zirvə görüşlərinin təcrübəsinə tam uyğundur.

İran səfirinin Kommünikenin guya qəbul olunması və İran tərəfindən ona qeyd-şərt qoyulması barədə iddiaları reallıqdan uzaqdır, çünki diplomatik praktikada qeyd-şərt yalnız danışıqlar nəticəsində qəbul edilmiş qərarlara tətbiq edilə bilər.

İslam Əməkdaşlıq Təşkilatının da İran daxil olmaqla, bir çox İƏT dövlətləri üzvüdür. Həmin dövlətlərin hamısı, 21-22 iyun tarixlərində İstanbulda keçirilmiş İƏT Nazirlər Şurasının 51-ci sessiyasının yekununda qəbul edilmiş "Hazırkı Ermənistan ərazilərindən zorla və sistematik şəkildə didərgin salınmış azərbaycanlıların qayıdış hüququ" adlı qətnamədə və İstanbul Bəyannaməsində Qərbi Azərbaycan İcmasının öz yurdlarına ləyaqətli qayıdış hüququna dəstək verib. Onlar Ermənistan tərəfindən bu İcmanın hüquqlarının inkar olunmasını qınayıblar. Xankəndi Kommünikesi də məhz bu konsensusla qəbul edilmiş bəyannaməyə istinadı ehtiva edib.

Ermənistanın İrandakı səfirinin son zamanlar Azərbaycan əleyhinə bu cür ittihamlar səsləndirməsi, sanki onun rəsmi İranın mövqeyindən daha çox Ermənistan cəmiyyətinin maraqlarını üstün tutan mövqedən çıxış etməsini göstərir. İranla Azərbaycan arasında həm ikitərəfli, həm də beynəlxalq müstəvidə yaxın qonşuluq münasibətləri var və onunla da yaxşı münasibətdə qalmaq istəyirik. Buna kölgə salmaq istəyənlərin cəhdləri isə hər zaman uğursuz olub.

Pərvanə Vəliyeva
Milli Məclisin deputatı

Telegramda izləyin