Tramp ABŞ baş prokurorundan Epşteyn işi üzrə ifadələrin ictimaiyyətə açıqlanmasını istəyib

ABŞ Prezidenti Donald Tramp baş prokuror Pem Bondiyə müraciət edərək, amerikalı maliyyəçi və adı insan alverində hallandırılan Cefri Epşteynin işi üzrə verilmiş ifadələrin stenoqramlarının məhkəmənin razılığı ilə açıqlanmasını istəyib.

Oxu.Az xəbər verir ki, D.Tramp bu barədə özünün "Truth Social" şəbəkə hesabında yazıb.

"Cefri Epşteynə göstərilən absurd diqqətdən dolayı, mən baş prokuror Pam Bondidən xahiş etdim ki, məhkəmənin təsdiqi ilə bütün lazımi böyük münsiflər heyəti ifadəsini təqdim etsin. Demokratların bu fırıldaqçılığına dərhal son qoyulmalıdır", - deyə D.Tramp qeyd edib.

Öz növbəsində baş prokuror Pem Bondi "X" hesabında D.Trampa cavab verib:

"Prezident Tramp, biz böyük münsiflər heyətinin stenoqramlarını sabah məhkəməyə təqdim etməyə hazırıq".

Məlumat üçün əlavə edək ki, Cefri Epşteynin işi ABŞ-də son onilliklərin ən böyük hüquqi və sosial qalmaqallarından biri kimi yadda qalıb. ABŞ-li milyarder və maliyyəçi Cefri Epşteyn azyaşlı qızları fahişəliyə cəlb etmək və insan alveri təşkil etməkdə ittiham olunurdu. Onun bu fəaliyyətində zəngin və nüfuzlu şəxslərlə əlaqələri dəfələrlə gündəmə gəlib. Onların sırasında tez-tez Donald Trampın da adı çəkilir.

Telegramda izləyin