Arıların hücumuna məruz qalan kişi allergik reaksiyadan vəfat etdi

60 yaşlı kişi eşşək arılarının hücumuna məruz qalıb və ağır allergik reaksiya nəticəsində həyatını itirib.

Sonxeber.az türk mediasına istinadən xəbər verir ki, hadisə 16 iyul tarixində, axşam saatlarında Türkiyədə baş verib. İki uşaq atası Yılmaz Dolgun, həyat yoldaşı Nezaket Dolgun ilə birlikdə hobi bağına gedib. Otları biçmək üçün motorlu tırpandan istifadə edən Dolgun, fərqində olmadan torpaqdakı eşşək arısı yuvasını dağıdıb. Bu zaman çoxsaylı arıların hücumuna məruz qalan kişi qəfildən özünü pis hiss edib.

Yoldaşının dərhal 112 Təcili Tibbi Yardım xidmətinə məlumat verməsi ilə hadisə yerinə həkim briqadası cəlb olunub. İlkin tibbi yardım bağ sahəsində göstərilsə də, Dolgun aparıldığı Bandırma Tədris və Araşdırma Xəstəxanasında bütün müdaxilələrə baxmayaraq vəfat edib.

Ağır xəbərdən sarsılan həyat yoldaşı Nezaket Dolgun da səhhətində problem yaşadığı üçün eyni xəstəxanada müşahidə altına alınıb. Onun vəziyyətinin stabil olduğu bildirilib.

Hadisə ilə bağlı araşdırma aparılır.

Telegramda izləyin