6 yaşlı uşağın çantasından 14 kilo narkotik çıxdı

İngiltərədə yaşayan 35 yaşlı Natashia Artug və onun altı yaşlı oğlu, tətildə olduqları Mauritius Adasında narkotik qaçaqmalçılığı ittihamı ilə saxlanılıb. Hadisə zamanı azyaşlı uşağın çantasından tam 14 kilo esrar aşkarlanıb.

Sonxeber.az türk mediasına istinadən xəbər verir ki, rəsmilərin verdiyi məlumata görə, çantadan şəffaf paketlərə bükülmüş 24 ədəd esrar bağlaması tapılıb. Hadisə təkcə bu iki şəxslə məhdudlaşmayıb – eyni təyyarədə səyahət edən daha 7 nəfərin də çantasında ümumilikdə 161 kilo narkotik vasitə aşkar edilib. Qaçaqmalçılıqla daşınan bu narkotikin bazar dəyəri təxminən 1.6 milyon funt sterlinq (təxminən 67 milyon türk lirəsi) olaraq qiymətləndirilir.

"Məni məcbur etdilər"

İddialara görə, Natashia Artug narkotik çetələri tərəfindən hədələnərək bu səfərə çıxmağa məcbur edilib. Beynəlxalq hüquq təşkilatı Justice Abroad-un yaydığı açıqlamada bildirilib ki, Natashia bu səyahətə könüllü getməyib və çantalarda narkotik maddə olduğunu bilmirmiş.

Saxlanılan şəxslər arasında Natashia’nın sevgilisi – 38 yaşlı rumıniyalı Florian Lisman da var. Onun çantasında 32 paket narkotik, bir iPhone və müəyyən məbləğdə nağd pul aşkar edilib.

Həmin təyyarədə olan digər britaniyalı sərnişinlərin çantalarında da 30-dan çox narkotik paketləri aşkarlanıb. Onların hamısının British Airways-ə məxsus təyyarə ilə Londonun Gatwick hava limanından Mauritius’a uçduğu məlum olub.

Çomadanlarda "Apple AirTag" cihazları aşkarlanıb

Hadisə ilə bağlı ortaya çıxan başqa bir diqqətçəkən detal isə budur: saxlanılan bütün şəxslərin valizlərində Apple AirTag izləmə cihazı yerləşdirilib. Tədqiqatçılar bu cihazların beynəlxalq narkotik şəbəkələri tərəfindən bağlamaların izlənməsi üçün istifadə olunduğunu düşünür.

"İnsanlıqdan kənar və ürəkbulandırıcı hadisə"

Mauritius polisi məsələ ilə bağlı sərt reaksiya verərək, belə bir halı uzun illərdir görmədiklərini bildirib:
"Körpə uşağın çantasından narkotik çıxması insanlıqdan kənar və ürək bulandırıcı bir hadisədir."

Oğlan uşağı hadisədən sonra İngiltərəyə göndərilərək atasına təhvil verilib.

Yardım kampaniyası başladıldı

Justice Abroad təşkilatı, Natashia Artug üçün hüquqi dəstək kampaniyası başladıb. Açıqlamada bildirilib ki, o, fibromiyalji xəstəsidir, universitet oxuyur və uşaqlarına yaxşı gələcək qurmaq istəyən tənha bir anadır.

Açıqlamada əlavə edilib:

"Hədələnərək bu səfərə məcbur edilib. Çantalarda narkotik olduğunu bilmirdi. İndi isə uşaqlarından uzaqda, xarici ölkədə həbs təhlükəsi ilə üz-üzədir."

İngiltərənin Xarici İşlər Nazirliyi də məsələni təsdiqləyərək bildirib ki, Mauritiusda saxlanılan britaniyalı vətəndaşa konsulluq dəstəyi göstərilir və yerli hakimiyyət orqanları ilə əlaqə saxlanılır.

Telegramda izləyin