Qardaşlar arasında park yeri davası qanla bitdi: biri öldü, biri yaralandı

İstanbulun Sancaktepe rayonunun Akpınar məhəlləsində eyni binada yaşayan qardaşlar arasında park yeri üstündə başlayan mübahisə faciə ilə nəticələnib.

Sonxeber.az türk mediasına istinadən xəbər verir ki, Ali Ş. və qardaşı Murat Ş. arasında avtomobilin dayanacağı ilə bağlı mübahisə yaranıb. Mübahisənin böyüməsi nəticəsində Ali Ş. odlu silahla qardaşı Murat Ş.-yə və onun həyat yoldaşı Cennet Ş.-yə atəş açıb.

Hadisə yerinə səs-küyü eşidən qonşuların məlumatı ilə hadisə yerinə polis və təcili tibbi yardım əməkdaşları gəlib. Sağlıq işçilərinin yoxlaması nəticəsində Murat Ş.-nin hadisə yerində həyatını itirdiyi müəyyən edilib. Ayağından yaralanan Cennet Ş. isə ilkin tibbi yardımdan sonra xəstəxanaya aparılıb.

Polis Ali Ş.-ni hadisədə istifadə etdiyi silahla birlikdə saxlayıb. Murat Ş.-nin meyiti araşdırmaların tamamlanmasının ardından Məhkəmə-Tibbi Ekspertiza Qurumunun morquna göndərilib.

Faktla bağlı istintaq başladılıb.

Telegramda izləyin