Vəfat edən gəncin iti 10 gün məzarı başında gözlədi – Məşhur sənətçi sahibləndi - VİDEO

Hakkarinin Yüksəkova rayonuna bağlı Akocak kəndində baş verən hadisə heyvan sevgisinin gücünü bir daha göz önünə sərib.

Sonxeber.az türk mediasına istinadən xəbər verir ki, Van şəhərində 27 yaşlı Muğdat Esener keçirdiyi ürək tutması nəticəsində xəstəxanada dünyasını dəyişib. Onun ölümü yalnız ailəsini və yaxınlarını deyil, 4 il əvvəl sahibləndiyi sadiq dostunu – itini də dərindən sarsıdıb.

21 iyulda Akocak kənd qəbiristanlığında dəfn edilən Esenerin iti, mərasim bitdikdən sonra belə sahibinin məzarını tərk etməyib. Tam 10 gün boyunca məzar başında gözləyən sədaqətli heyvan həm ailəni, həm də qəbiristanlığı ziyarət edənləri duyğulandırıb.

Esenerin qardaşı Enes Esener hadisə ilə bağlı belə deyib:

"Dəfndən bu yana 10 gün keçib, amma it hələ də məzarın yanındadır. Onun bu sədaqəti bizi çox təsirləndirdi. Bu it artıq bizim üçün qardaşımın bir yadigarıdır."

Hadisə sosial mediada böyük rezonans doğurub. Minlərlə insan paylaşım edərək həm Muğdat Esenerə, həm də itin sədaqətinə hörmətini ifadə edib. Qısa müddətdə bu hadisə ölkə gündəminə çevrilib.

Sonradan itə sahib çıxan şəxs isə diqqət çəkib. Tanınmış sənətçi Ceylan Ertem sosial şəbəkə hesabında paylaşım edərək heyvanı sahibləndiyini bildirib:
"Adını Heval qoydum. Yoldaş, dost deməkdir," – deyə Ertem yazıb.

Telegramda izləyin