Sifariş etdiyi yeməyin içindən canlı siçan balası çıxdı - restoran bağlandı - VİDEO

Honq-Konqda bir qadın sifariş etdiyi mal əti ilə düyü əriştəsinin içindən canlı siçan balası çıxması ilə böyük şok yaşayıb.

Sonxeber.az xarici mediaya istinadla xəbər verir ki, hadisə Wah Sing Sənaye Binasında fəaliyyət göstərən Wa Jer Restaurant adlı restoranda baş verib. Qadın 44 Honq-Konq dollarına mal əti ilə düyü əriştəsi sifariş edib. Yeməyi təhvil aldıqdan sonra qutunu açan müştəri sousun içərisində hərəkət edən canlı gəmirici balası görüb.

Qadın gördüklərini telefonuna çəkərək hadisə barədə aidiyyəti qurumlara məlumat verib.

Məlumatın ardından Honq-Konq Qida və Ətraf Mühit Gigiyenası Departamentinin əməkdaşları restorana gedərək mətbəx və qida hazırlanması sahələrində yoxlama aparıblar. İlkin araşdırma zamanı müəssisədə gigiyena qaydalarının pozulduğu müəyyən edilib.

Bunun ardından restoranın rəhbərliyi barəsində qida təhlükəsizliyi qanunvericiliyi çərçivəsində hüquqi proses başladılıb.

Bir ildən artıqdır fəaliyyət göstərdiyi bildirilən restoran hadisədən sonra genişmiqyaslı təmizlik, dezinfeksiya və zərərvericilərə qarşı mübarizə işlərinin aparılması məqsədilə müvəqqəti bağlanıb.

Restoranın sahibi isə müəssisənin sənaye ərazisində yerləşdiyini və buna görə gəmiricilərə qarşı tədbirlər gördüklərini bildirib. İşletmənin hər ay müntəzəm olaraq dərmanlandığını deyən sahibkar hadisədən özü də təəccübləndiyini qeyd edib.

Telegramda izləyin