Şəhər Xəstəxanasının həyətində meyit tapıldı

Türkiyənin Gaziantep şəhərində Şəhər Xəstəxanasının həyətindəki kolluq ərazidə bir şəxsin meyiti aşkarlanıb. Mərhumun ailəsinin itkin düşməsi barədə polisə məlumat verdiyi 46 yaşlı S.O. olduğu müəyyənləşib.

Sonxeber.az xarici mediya istinadla xəbər verir ki, hadisə Şahinbəy rayonunun İbni Sina məhəlləsində yerləşən Gaziantep Şəhər Xəstəxanasının ərazisində baş verib.

Xəstəxananın həyətindəki kolluqdan güclü qoxunun gəldiyini hiss edən vətəndaşlar vəziyyət barədə xəstəxana rəhbərliyinə məlumat veriblər. Məlumat əsasında əraziyə polis və tibbi yardım briqadaları cəlb olunub.

Ərazidə aparılan yoxlama zamanı kolluqların arasında bir şəxsin cansız bədəni aşkarlanıb. Hadisə yerindəki araşdırmalardan sonra meyit kimliyinin və ölüm səbəbinin müəyyənləşdirilməsi üçün Gaziantep Ədli Tibb Qurumunun morquna aparılıb.

Ədli Tibb Qurumunda aparılan araşdırma nəticəsində meyitin ailəsinin itkin düşməsi barədə məlumat verdiyi 46 yaşlı S.O.-ya məxsus olduğu müəyyən edilib.

S.O.-nun hansı şəraitdə həyatını itirdiyi hələlik məlum deyil. Onun dəqiq ölüm səbəbi aparılacaq yarılmadan sonra müəyyənləşəcək.

Hadisə ilə bağlı araşdırma başladılıb.

Telegramda izləyin