Meşədə dostlar arasında dava: 1 ölü, 1 yaralı

Bilecik şəhərində yerləşən Atatürk Meşəsində spirtli içki qəbul edən dostlar arasında yaranan mübahisə faciə ilə nəticələnib.

Sonxeber.az türk mediasına istinadən xəbər verir ki, hadisə Ertuğrulgazi məhəlləsində yerləşən Atatürk Meşəsində baş verib. İddialara görə, meşəyə girən 5-6 nəfərlik dost qrupu spirtli içki içməyə başlayıb. Bir müddət sonra hələlik səbəbi məlum olmayan mübahisə dostlardan H.B. ilə Cengiz Uçar arasında düşüb.

Mübahisə qısa müddətdə böyüyərək davaya çevrilib. Dava zamanı xəsarət alan H.B. avtomobilindən tüfəng götürərək Cengiz Uçara atəş açıb. Nəticədə Cengiz Uçar hadisə yerində həyatını itirib. Yaralanan H.B. isə Bilecik Təhsil və Araşdırma Xəstəxanasına çatdırılıb.

Əraziyə polis və prokurorluq əməkdaşları cəlb olunub, geniş təhlükəsizlik tədbirləri görülüb. Prokurorun hadisə yerindəki araşdırmasından sonra Cengiz Uçarın meyiti Bilecik Təhsil və Araşdırma Xəstəxanasına aparılıb.

Faktla bağlı istintaq aparılır.

Telegramda izləyin